¹ Подражателе мне бывайте, якоже и аз Христу.

² Хвалю же вы, братие, яко вся моя помните, и якоже предах вам, предания держите.

³ Хощу же вас ведети, яко всякому мужу глава Христос есть, глава же жене муж, глава же Христу Бог.

⁴ Всяк муж, молитву дея или пророчествуяй покрытою главою, срамляет главу свою:

⁵ и всяка жена, молитву деющая или пророчествующая откровенною главою, срамляет главу свою: едино бо есть и тожде остриженней:

⁶ аще бо не покрывается жена, да стрижется: аще ли же срам жене стрищися или бритися, да покрывается.

⁷ Муж убо не должен есть покрывати главу, образ и слава Божия сый: жена же слава мужу есть.

⁸ Несть бо муж от жены, но жена от мужа:

⁹ ибо не создан бысть муж жены ради, но жена мужа ради.

¹⁰ Сего ради должна есть жена власть имети на главе Ангел ради.

¹¹ Обаче ни муж без жены, ни жена без мужа, о Господе.

¹² Якоже бо жена от мужа, сице и муж женою: вся же от Бога.

¹³ В вас самех судите, лепо ли есть жене откровенней Богу молитися?

¹⁴ Или и не самое естество учит вы, яко муж убо аще власы растит, безчестие ему есть,

¹⁵ жена же аще власы растит, слава ей есть? Зане растение власов вместо одеяния дано бысть ей.

¹⁶ Аще ли кто мнится спорлив быти, мы таковаго обычая не имамы, ниже церкви Божия.

¹⁷ Сие же завещавая не хвалю, яко не на лучшее, но на хуждшее сбираетеся.

¹⁸ Первое убо, сходящымся вам в церковь, слышу в вас распри сущыя, и часть некую (сих) верую.

¹⁹ Подобает бо и ересем в вас быти, да искуснии явлени бывают в вас.

²⁰ Сходящымся убо вам вкупе, несть Господскую вечерю ясти:

²¹ кийждо бо свою вечерю предваряет в снедение, и ов убо алчет, ов же упивается.

²² Еда бо домов не имате, во еже ясти и пити? Или о церкви Божией нерадите и срамляете не имущыя? Что вам реку? Похвалю ли вы о сем? Не похвалю.

²³ Аз бо приях от Господа, еже и предах вам, яко Господь Иисус в нощь, в нюже предан бываше, приемь хлеб,

²⁴ и благодарив преломи, и рече: приимите, ядите, сие есть Тело Мое, еже за вы ломимое: сие творите в Мое воспоминание.

²⁵ Такожде и чашу по вечери, глаголя: сия чаша новый завет есть в Моей Крови: сие творите, елижды аще пиете, в Мое воспоминание.

²⁶ Елижды бо аще ясте хлеб сей и чашу сию пиете, смерть Господню возвещаете, дондеже приидет.

²⁷ Темже иже аще яст хлеб сей или пиет чашу Господню недостойне, повинен будет Телу и Крови Господни.

²⁸ Да искушает же человек себе, и тако от хлеба да яст и от чаши да пиет.

²⁹ Ядый бо и пияй недостойне, суд себе яст и пиет, не разсуждая Тела Господня.

³⁰ Сего ради в вас мнози немощни и недужливи, и спят доволни.

³¹ Аще бо быхом себе разсуждали, не быхом осуждени были.

³² Судими же, от Господа наказуемся, да не с миром осудимся.

³³ Темже, братие моя, сходящеся ясти, друг друга ждите.

³⁴ Аще ли кто алчет, в дому да яст, да не в грех сходитеся. О прочих же, егда прииду, устрою.