¹ Отнюд слышится в вас блужение, и таково блужение, яковоже ни во языцех именуется, яко некоему имети жену отчую.

² И вы разгордесте, и не паче плакасте, да измется от среды вас содеявый дело сие.

³ Зане аз убо аще не у вас сый телом, ту же живый духом, уже судих, яко тамо сый: содеявшаго сице сие,

⁴ о имени Господа нашего Иисуса Христа собравшымся вам и моему духу, с силою Господа нашего Иисуса Христа,

⁵ предати таковаго сатане во измождение плоти, да дух спасется в день Господа нашего Иисуса Христа.

⁶ Не добра похвала ваша. Не весте ли, яко мал квас все смешение квасит?

⁷ Очистите убо ветхий квас, да будете ново смешение, якоже есте безквасни: ибо Пасха наша за ны пожрен бысть Христос.

⁸ Темже да празднуем не в квасе ветсе, ни в квасе злобы и лукавства, но в безквасиих чистоты и истины.

⁹ Писах вам в послании не примешатися блудником:

¹⁰ и не всяко блудником мира сего, или лихоимцем, или хищником, или идолослужителем, понеже убо должни бы есте были от мира (сего) изыти:

¹¹ ныне же писах вам не примешатися, аще некий, брат именуемь, будет блудник, или лихоимец, или идолослужитель, или досадитель, или пияница, или хищник: с таковым ниже ясти.

¹² Что бо ми и внешних судити? Не внутренних ли вы судите?

¹³ Внешних же Бог судит. И измите злаго от вас самех.