¹ О милостыни же, яже ко святым, якоже устроих церквам Галатийским, тако и вы сотворяйте:

² по единей от суббот кийждо вас да полагает у себе сохраняя, еже аще что благопоспешится, да не егда прииду, тогда собрания бывают.

³ Егда же прииду, ихже аще искусите, с посланьми сих послю отнести благодать вашу во Иерусалим.

⁴ Аще же достойно будет и мне ити, со мною пойдут.

⁵ Прииду же к вам, егда Македонию преиду: Македонию бо прохожду.

⁶ У вас же, аще случится мне, пребуду, или и озимею, да вы мя проводите, аможе аще поиду.

⁷ Не хощу бо вас ныне в мимохождении видети: уповаю же время некое пребыти у вас, аще Господь повелит.

⁸ Пребуду же во Ефесе до Пентикостии:

⁹ дверь бо ми отверзеся велика и поспешна, и сопротивнии мнози.

¹⁰ Аще же приидет Тимофей, блюдите, да без страха будет у вас: дело бо Господне делает, якоже и аз:

¹¹ да никтоже убо его уничижит: проводите же его с миром, да приидет ко мне, жду бо его с братиею.

¹² О Аполлосе же брате: много молих его, да приидет к вам с братиею: и всяко не бе воля, да ныне приидет, приидет же, егда упразднится.

¹³ Бодрствуйте, стойте в вере, мужайтеся, утверждайтеся:

¹⁴ вся вам любовию да бывают.

¹⁵ Молю же вы, братие: весте дом Стефанинов, яко есть начаток Ахаии, и в служение святым учиниша себе:

¹⁶ да и вы повинуйтеся таковым и всякому споспешствующу и труждающуся.

¹⁷ Возрадовахся же о пришествии Стефанинове и Фуртунатове и Ахаикове, яко ваше лишение сии исполниша:

¹⁸ упокоиша бо мой дух и ваш. Познавайте убо таковыя.

¹⁹ Целуют вы церкви Асийския: целуют вы о Господе много Акила и Прискилла с домашнею их церковию.

²⁰ Целуют вы братия вся. Целуйте друг друга лобзанием святым.

²¹ Целование моею рукою Павлею.

²² Аще кто не любит Господа Иисуса Христа, да будет проклят, маран афа.

²³ Благодать Господа нашего Иисуса Христа с вами,

²⁴ (и) любы моя со всеми вами о Христе Иисусе. Аминь.