¹ Сие уже, возлюбленнии, второе вам пишу послание, в нихже возбуждаю воспоминанием ваш чистый смысл,

² помянути прежде реченныя глаголы от святых пророк, и Апостол ваших заповедь Господа и Спаса:

³ сие прежде ведяще, яко приидут в последния дни ругателе, по своих похотех ходяще

⁴ и глаголюще: где есть обетование пришествия Его, отнележе бо отцы успоша, вся тако пребывают от начала создания.

⁵ Таится бо им сие хотящым, яко небеса беша исперва, и земля от воды и водою составлена, Божиим словом:

⁶ темже тогдашнии мир, водою потоплен быв, погибе.

⁷ А нынешняя небеса и земля темже Словом сокровена суть, огню блюдома на день суда и погибели нечестивых человек.

⁸ Едино же сие да не утаится вас, возлюбленнии, яко един день пред Господем яко тысяща лет, и тысяща лет яко день един.

⁹ Не коснит Господь обетования, якоже нецыи коснение мнят: но долготерпит на нас, не хотя да кто погибнет, но да вси в покаяние приидут.

¹⁰ Приидет же день Господень яко тать в нощи, в оньже небеса убо с шумом мимо идут, стихии же сжигаемы разорятся, земля же и яже на ней дела сгорят.

¹¹ Сим убо всем разоряемым, кацем подобает быти вам во святых пребываниих и благочестиих,

¹² чающым и скорее быти желающым пришествия Божияго дне, егоже ради небеса жегома разорятся, и стихии опаляемы растаются?

¹³ Нова же небесе и новы земли по обетованию Его чаем, в нихже правда живет.

¹⁴ Темже, возлюбленнии, сих чающе, потщитеся нескверни и непорочни Тому обрестися в мире,

¹⁵ и Господа нашего долготерпение спасение непщуите, якоже и возлюбленный наш брат Павел по данней ему премудрости написа вам,

¹⁶ якоже и во всех своих посланиих, глаголя в них о сих: в нихже суть неудобь разумна некая, яже ненаучени и неутверждени развращают, якоже и прочая Писания, к своей погибели им.

¹⁷ Вы же убо, возлюбленнии, предведяще хранитеся, да не лестию беззаконных сведени бывше, отпадете своего утверждения.

¹⁸ Но да растете во благодати и разуме Господа нашего и Спаса Иисуса Христа. Тому слава и ныне и в день века. Аминь.