¹ ¶ Yumi bai tok wanem nau? Ating yumi bai stap yet long sin, inap long marimari i ken pulap tru?

² I no ken tru. Yumi, husat i dai pinis long sin, bai stap laip insait long en moa liklik olsem wanem?

³ Ating yupela i no save, long hamas bilong yumi i kisim baptais insait long Jisas Kraist i kisim baptais insait long dai bilong em?

⁴ Olsem na God i planim yumi wantaim em long baptais long dai, inap long wankain olsem God i kirapim Kraist long dai long glori bilong Papa, yes, olsem tasol yumi tu mas wokabaut long nupela laip.

⁵ Long wanem, sapos God i bin planim yumi wantaim insait long piksa bilong dai bilong em, yumi bai stap tu insait long piksa bilong kirap bek bilong em.

⁶ Yumi save long dispela, long God i nilim olpela man bilong yumi long diwai kros pinis wantaim em, inap long dispela bodi bilong sin i ken bagarap olgeta, inap long i stat long nau i go yumi no ken bihainim sin.

⁷ Long wanem, em husat i dai pinis i stap fri long pawa bilong sin.

⁸ Nau sapos yumi stap daiman wantaim Kraist, yumi bilip olsem long yumi bai stap laip wantaim em tu,

⁹ Taim yumi save long taim Kraist i kirap long dai em i no inap dai moa. Dai i no gat strong moa long bosim em.

¹⁰ Long wanem, long dispela, em i dai, em i dai long sin wanpela taim. Tasol long dispela, em i stap laip, em i stap laip i go long God.

¹¹ Wankain olsem kaunim yupela yet tu olsem yupela i stap daiman tru long sin, tasol ol man i stap laip long God long wok bilong Jisas Kraist, Bikpela bilong yumi.

¹² Olsem na no ken larim sin bosim kingdom insait long bodi bilong yupela i ken dai, inap long yupela i ken bihainim em long ol aigris bilong en.

¹³ Na tu yupela i no ken givim ol hap bilong bodi bilong yupela olsem ol samting bilong wokim pasin i no stretpela i go long sin. Tasol givim yupela yet i go long God, olsem ol dispela husat i stap laip long dai, na ol hap bilong bodi bilong yupela olsem ol samting bilong wokim stretpela pasin i go long God.

¹⁴ Long wanem, sin bai i no inap gat strong long bosim yupela. Long wanem, yupela i no stap aninit long lo, tasol aninit long marimari.

¹⁵ Wanem nau? Bai yumi sin, bikos yumi i no stap aninit long lo, tasol aninit long marimari? I no ken tru.

¹⁶ Ating i yes long yupela i save, long em husat yupela i givim yupela yet olsem wokboi bilong bihainim, yupela i stap ol wokboi bilong em husat yupela i bihainim, sapos long sin i go long dai, o long pasin bilong bihainim tok i go long stretpela pasin?

¹⁷ Tasol tok tenkyu i go long God, long yupela i bin stap ol wokboi bilong sin, tasol yupela i bin bihainim dispela kain skul wantaim bel, dispela mipela i givim long yupela.

¹⁸ Nau taim yupela i kamap fri long pawa bilong sin, yupela i kamap ol wokboi bilong stretpela pasin.

¹⁹ Mi toktok i bihainim pasin bilong ol man, bilong wanem, bodi bilong yupela i no gat strong. Long wanem, olsem yupela i bin givim ol hap bilong bodi bilong yupela olsem ol wokboi bilong pasin i no klin na long sin nogut i go long sin nogut, yes, olsem tasol nau givim ol hap bilong bodi bilong yupela olsem ol wokboi bilong stretpela pasin i go long pasin holi.

²⁰ Long wanem, taim yupela i stap ol wokboi bilong sin, yupela i stap fri long stretpela pasin.

²¹ Yupela i bin gat wanem kaikai nau long ol dispela samting we yupela i sem nau long en? Long wanem, pinis bilong ol dispela samting em dai.

²² Tasol nau taim God i mekim yupela i kamap fri long pawa bilong sin, na kamap ol wokboi bilong God, yupela i gat kaikai bilong yupela i go long pasin holi, na pinis bilong en, laip i stap gut oltaim oltaim.

²³ Long wanem, pe bilong sin em i dai. Tasol presen bilong God em i laip i stap gut oltaim oltaim long wok bilong Jisas Kraist, Bikpela bilong yumi.