¹ But Y seie, as long tyme as the eir is a litil child, he dyuersith no thing fro a seruaunt, whanne he is lord of alle thingis;

² but he is vndur keperis and tutoris, in to the tyme determyned of the fadir.

³ So we, whanne we weren litle children, we serueden vndur the elementis of the world.

⁴ But aftir that the fulfilling of tyme cam, God sente his sone,

⁵ maad of a womman, maad vndur the lawe, that he schulde ayenbie hem that weren vndur the lawe, that we schulden vnderfonge the adopcioun of sones.

⁶ And for ye ben Goddis sones, God sente his spirit in to youre hertis, criynge, Abba, fadir.

⁷ And so ther is not now a seruaunt, but a sone; and if he is a sone, he is an eir bi God.

⁸ But thanne ye vnknowynge God, serueden to hem that in kynde weren not goddis.

⁹ But now whanne ye han knowe God, and ben knowun of God, hou ben ye turned eftsoone to the febil and nedi elementis, to the whiche ye wolen eft serue?

¹⁰ Ye taken kepe to daies, and monethis, and tymes, and yeris.

¹¹ But Y drede you, lest without cause Y haue trauelid among you.

¹² Be ye as Y, for Y am as ye. Britheren, Y biseche you, ye han hurt me no thing.

¹³ But ye knowen, that bi infirmyte of fleisch Y haue prechid to you now bifore;

¹⁴ and ye dispiseden not, nether forsoken youre temptacioun in my fleisch, but ye resseyueden me as an aungel of God, as `Crist Jhesu.

¹⁵ Where thanne is youre blessyng? For Y bere you witnesse, that if it myyte haue be don. ye wolden haue put out youre iyen, and haue yyuen hem to me.

¹⁶ Am Y thanne maad an enemye to you, seiynge to you the sothe?

¹⁷ Thei louen not you wel, but thei wolen exclude you, that ye suen hem.

¹⁸ But sue ye the good euermore in good, and not oneli whanne Y am present with you.

¹⁹ My smale children, whiche Y bere eftsoones, til that Crist be fourmed in you,

²⁰ and Y wolde now be at you, and chaunge my vois, for Y am confoundid among you.

²¹ Seie to me, ye that wolen be vndir the lawe, `han ye not red the lawe?

²² For it is writun, that Abraham hadde two sones, oon of a seruaunt, and oon of a fre womman.

²³ But he that was of the seruaunt, was borun after the flesh; but he that was of the fre womman, by a biheeste.

²⁴ The whiche thingis ben seid bi an othir vndirstonding. For these ben two testamentis; oon in the hille of Synai, gendringe in to seruage, which is Agar.

²⁵ For Syna is an hille that is in Arabie, which hille is ioyned to it that is now Jerusalem, and seruith with hir children.

²⁶ But that Jerusalem that is aboue, is fre, whiche is oure modir.

²⁷ For it is writun, Be glad, thou bareyn, that berist not; breke out and crye, that bringist forth no children; for many sones ben of hir that is left of hir hosebonde, more than of hir that hath an hosebonde.

²⁸ For, britheren, we ben sones of biheeste aftir Isaac;

²⁹ but now as this that was borun after the fleisch pursuede him that was aftir the spirit, so now.

³⁰ But what seith the scripture? Caste out the seruaunt and hir sone, for the sone of the seruaunt schal not be eir with the sone of the fre wijf.

³¹ And so, britheren, we ben not sones of the seruaunt, but of the fre wijf, bi which fredom Crist hath maad vs fre.