¹ PAULUS salidi en Kristus Iesus amen, o ri atail Timoteus ong Pilemon kompoke pat o at warok ni dodok kan.

² O ri atail li Apia, o sauas pat Arkipus, o momodisou, me mi nan tanpas omui;

³ Mak o popol sang ren Kot sam atail o atail Kaun Iesus Kristus en mi re omui!

⁴ I kin danke ai Kot ni ai kapakap kin komui ansau karos.

⁵ Pwe i ronger duen omui limpok o poson ong Kaun Iesus o ong saraui kan karos.

⁶ Pwe poson o me mi re ’tail en kakairida re omui, ni omui dedeki duen me mau kan karos, me mi reatail sang ren Kristus.

⁷ Kit peren kidar o kamait kilar omui limpok, pwe mongiong en saraui kan en kelail kilar komui, ri ai.

⁸ I me i aimaki ren Kristus kusoned eki ong komui duen me pan wiaui.

⁹ Ari so, pweki ai limpok ong komui i men poeki ta re omui, pwe ngai Paulus likailapalar o salidi en Kristus amen.

¹⁰ I poeki re omui nai seri Onesimus, me i wiadar ni ai salidi,

¹¹ Me so katepa ong komui mas o, a met a katepa ong komui o ngai.

¹² I me i kapure ong komui, komui ari apwali i, dueta pein mongiong i.

¹³ Pwe i mauki a en mimieta re i, pwen papa ia ni ai saliekidi rongamau, wiliandi komui,

¹⁴ A i sota men wia meakot, me sota pwili sang kupur omui, pwe omui wia mau ender mansairen a somansairen.

¹⁵ Ele a tang sang re omui ansau kis, pwe komui en pur ong naineki i kokolata.

¹⁶ Kaidin due ladu amen, a mau sang ladu amen, pwe due ri omui kompok amen; iduen re i, a re omui pan laud sang ni pali uduk a o ni pali en Kaun.

¹⁷ Ma komui akawarok kin ia, apwali i dueta pein ngai.

¹⁸ A ma a wia sapung ong komui er, de pwaipwand ong komui, i pan kapungala.

¹⁹ Met ngai Paulus intingkier pein pa i, i pan pwain, ari so, i so pan inda, me komui pwaipwand ki ong ia pein komui.

²⁰ Ei ri ai, i men paiekin komui ren Kaun o, kainsenemauda mongiong i ren Kristus.

²¹ I kaporoporeki om peik, ap inting wong komui. A i asa, me komui pan wia laud sang, me inda.

²² I men, komui en kaonopada deu i, pwe i kaporoporeki, me i pan lapwadang komail ki omail kapakap.

²³ En Epapras, ai warok ni ai salidi pan Kristus Iesus, a ranamau wong komui.

²⁴ O Markus, o Aristarkus, o Demas, o Lukas ai warok en dodok kan.

²⁵ Mak en atail Kaun Iesus Kristus kin iang ngen omail! Amen.