¹ Темже убо и мы, толик имуще облежащь нас облак свидетелей, гордость всяку отложше и удобь обстоятелный грех, терпением да течем на предлежащий нам подвиг,

² взирающе на началника веры и совершителя Иисуса, Иже вместо предлежащия Ему радости претерпе крест, о срамоте нерадив, о десную же престола Божия седе.

³ Помыслите убо таковое Пострадавшаго от грешник на Себе прекословие, да не стужаете, душами своими ослабляеми.

⁴ Не у до крове стасте, противу греха подвизающеся,

⁵ и забысте утешение, еже вам яко сыном глаголет: сыне мой, не пренемогай наказанием Господним, ниже ослабей, от Него обличаемь.

⁶ Егоже бо любит Господь, наказует: биет же всякаго сына, егоже приемлет.

⁷ Аще наказание терпите, якоже сыновом обретается вам Бог. Который бо есть сын, егоже не наказует отец?

⁸ Аще же без наказания есте, емуже причастницы быша вси, убо прелюбодейчищи есте, а не сынове.

⁹ К сим, плоти нашей отцы имехом наказатели, и срамляхомся: не много ли паче повинемся Отцу духовом, и живи будем?

¹⁰ Они бо в мало дний, якоже годе им бе, наказоваху нас: а Сей на пользу, да причастимся святыни Его.

¹¹ Всякое бо наказание в настоящее время не мнится радость быти, но печаль: последи же плод мирен наученым тем воздает правды.

¹² Темже ослабленныя руки и ослабленная колена исправите

¹³ и стези правы сотворите ногами вашими, да не хромое совратится, но паче да изцелеет.

¹⁴ Мир имейте и святыню со всеми, ихже кроме никтоже узрит Господа:

¹⁵ смотряюще, да не кто лишится благодати Божия: да не кий корень горести, выспрь прозябаяй, пакость сотворит, и тем осквернятся мнози:

¹⁶ да не кто блудодей, или сквернитель, якоже Исав, иже за ядь едину отдал есть первородство свое.

¹⁷ Весте бо, яко и потом похотев наследовати благословение, отвержен бысть: покаяния бо места не обрете, аще и со слезами поискал его.

¹⁸ Не приступисте бо к горе осязаемей и разгоревшемуся огню, и облаку и сумраку, и буре

¹⁹ и трубному звуку, и гласу глаголгол, егоже слышавшии отрекошася, да не приложится им слово,

²⁰ не терпяху бо повелевающаго: аще и зверь прикоснется горе, камением побиен будет:

²¹ и тако страшно бе видимое, Моисей рече: пристрашен есмь и трепетен.

²² Но приступисте к Сионстей горе и ко граду Бога живаго, Иерусалиму небесному и тмам Ангелов,

²³ торжеству и церкви первородных на небесех написанных, и Судии всех Богу и духом праведник совершенных,

²⁴ и к Ходатаю завета новаго Иисусу и Крови кропления, лучше глаголющей, нежели Авелева.

²⁵ Блюдите (же), да не отречетеся Глаголющаго. Аще бо не избежаша они отрекшиися пророчествующаго на земли, множае паче мы отрицающиися небеснаго,

²⁶ Егоже глас землю тогда поколеба, ныне же обетова, глаголя: еще единою Аз потрясу не токмо землею, но и небом.

²⁷ А еже еще единою, сказует колеблемых преложение, аки сотворенных, да пребудут, яже суть неподвижимая.

²⁸ Темже царство непоколебимо приемлюще, да имамы благодать, еюже служим благоугодно Богу с благоговением и страхом,

²⁹ ибо Бог наш огнь поядаяй (есть).