¹ Чадца моя, сия пишу вам, да не согрешаете: и аще кто согрешит, ходатая имамы ко Отцу, Иисуса Христа праведника:

² и Той очищение есть о гресех наших, не о наших же точию, но и о всего мира.

³ И о сем разумеем, яко познахом Его, аще заповеди Его соблюдаем.

⁴ Глаголяй, яко познах Его, и заповеди Его не соблюдает, ложь есть, и в сем истины несть:

⁵ а иже аще соблюдает слово Его, поистинне в сем любы Божия совершенна есть: о сем разумеем, яко в Нем есмы.

⁶ Глаголяй, в Нем пребывати, должен есть, якоже Он ходил есть, и сей такожде да ходит.

⁷ Возлюбленнии, не заповедь нову пишу вам, но заповедь ветху, юже иместе исперва. Заповедь ветха есть слово, еже слышасте исперва.

⁸ Паки заповедь нову пишу вам, еже есть поистинне в Нем и в вас: яко тма мимоходит и свет истинный сей уже сияет.

⁹ Глаголяй себе во свете быти, а брата своего ненавидяй, во тме есть доселе.

¹⁰ Любяй брата своего во свете пребывает, и соблазна в нем несть.

¹¹ А ненавидяй брата своего во тме есть, и во тме ходит, и не весть, камо идет, яко тма ослепи очи ему.

¹² Пишу вам, чадца, яко оставляются вам греси имене Его ради.

¹³ Пишу вам, отцы, яко познасте Безначалнаго. Пишу вам, юноши, яко победисте лукаваго. Пишу вам, дети, яко познасте Отца.

¹⁴ Писах вам, отцы, яко познасте Исконнаго: писах вам, юноши, яко крепцы есте, и слово Божие в вас пребывает, и победисте лукаваго.

¹⁵ Не любите мира, ни яже в мире: аще кто любит мир, несть любве Отчи в нем:

¹⁶ яко все, еже в мире, похоть плотская и похоть очима и гордость житейская, несть от Отца, но от мира сего есть.

¹⁷ И мир преходит, и похоть его, а творяй волю Божию пребывает во веки.

¹⁸ Дети, последняя година есть. И якоже слышасте, яко антихрист грядет, и ныне антихристи мнози быша, от сего разумеваем, яко последний час есть.

¹⁹ От нас изыдоша, но не беша от нас: аще бы от нас были, пребыли убо быша с нами: но да явятся, яко не суть вси от нас.

²⁰ И вы помазание имате от Святаго, и весте вся.

²¹ Не писах вам, яко не весте истины, но яко весте ю и яко всяка лжа от истины несть.

²² Кто есть лживый, точию отметаяйся, яко Иисус несть Христос? Сей есть антихрист, отметаяйся Отца и Сына.

²³ Всяк отметаяйся Сына, ни Отца имать: а исповедаяй Сына, и Отца имать.

²⁴ Вы убо еже слышасте исперва, в вас да пребывает: (и) аще в вас пребудет, еже исперва слышасте, и вы в Сыне и Отце пребудете.

²⁵ И сие есть обетование, еже Сам обеща нам, живот вечный.

²⁶ Сия писах вам о льстящих вас.

²⁷ И вы еже помазание приясте от Него, в вас пребывает, и не требуете, да кто учит вы: но яко то само помазание учит вы о всем, и истинно есть, и несть ложно: и якоже научи вас, пребывайте в нем.

²⁸ И ныне, чадца, пребывайте в Нем, да егда явится, имамы дерзновение и не посрамимся от Него в пришествии Его.

²⁹ Аще весте, яко праведник есть, разумейте, яко всяк творяй правду от Него родися.