¹ Должни есмы мы сильнии немощи немощных носити, и не себе угождати:

² кииждо же вас ближнему да угождает во благое к созиданию.

³ Ибо и Христос не Себе угоди, но якоже есть писано: поношения поносящих Тебе нападоша на Мя.

⁴ Елика бо преднаписана быша, в наше наказание преднаписашася, да терпением и утешением Писаний упование имамы.

⁵ Бог же терпения и утешения да даст вам тожде мудрствовати друг ко другу о Христе Иисусе,

⁶ да единодушно едиными усты славите Бога и Отца Господа нашего Иисуса Христа.

⁷ Темже приемлите друг друга, якоже и Христос прият вас во славу Божию.

⁸ Глаголю же Христа Иисуса служителя бывша обрезания по истине Божией, во еже утвердити обетования отцев.

⁹ А языком по милости, прославити Бога, якоже есть писано: сего ради исповемся Тебе во языцех, Господи, и имени Твоему пою.

¹⁰ И паки глаголет: возвеселитеся, языцы, с людьми Его.

¹¹ И паки: хвалите Господа, вси языцы, и похвалите Его, вси людие.

¹² И паки Исаиа глаголет: будет корень Иессеов, и востаяй владети над языки: на Того языцы уповают.

¹³ Бог же упования да исполнит вас всякия радости и мира в вере, избыточествовати вам во уповании, силою Духа Святаго.

¹⁴ Извещен же есмь, братие моя, и сам аз о вас, яко и сами вы полни есте благости, исполнени всякаго разума, могуще и иныя научити:

¹⁵ дерзее же писах вам, братие моя, от части, яко воспоминая вам, за благодать данную ми от Бога,

¹⁶ во еже быти ми служителю Иисус Христову во языцех, священнодействующу благовествование Божие, да будет приношение еже от язык благоприятно и освященно Духом Святым.

¹⁷ Имам убо похвалу о Христе Иисусе в тех, яже к Богу:

¹⁸ не смею бо глаголати что, ихже не содея Христос мною, в послушание языков, словом и делом,

¹⁹ в силе знамений и чудес, силою Духа Божия, якоже ми от Иерусалима и окрест даже до Иллирика исполнити благовествование Христово.

²⁰ Сице же потщахся благовестити, не идеже именовася Христос, да не на чужем основании созижду,

²¹ но якоже есть писано: имже не возвестися о Нем, узрят, и иже не слышаша, уразумеют.

²² Темже и возбранен бых многажды приити к вам.

²³ Ныне же ктому места не имыи в странах сих, желание же имый приити к вам от многих лет,

²⁴ яко аще поиду во Испанию, прииду к вам. Уповаю бо мимогрядый видети вас и вами проводитися тамо, аще вас прежде от части насыщуся.

²⁵ Ныне же гряду во Иерусалим, служяй святым,

²⁶ благоволиша бо Македониа и Ахаиа общение некое сотворити к нищым святым живущым во Иерусалиме.

²⁷ Благоволиша бо, и должни им суть. Аще бо в духовных их причастницы быша языцы, должни суть и в плотских послужити им.

²⁸ Сие убо скончав, и запечатлев им плод сей, поиду вами во Испанию:

²⁹ вем же, яко грядый к вам, во исполнении благословения благовестия Христова прииду.

³⁰ Молю же вы, братие, Господем нашим Иисус Христом и любовию Духа, споспешствуите ми в молитвах о мне к Богу,

³¹ да избавлюся от противляющихся во Иудеи, и да служба моя, яже во Иерусалиме, благоприятна будет святым.

³² Да с радостию прииду к вам волею Божиею и упокоюся с вами.

³³ Бог же мира со всеми вами. Аминь.