¹ Истину глаголю о Христе, не лгу, послушествующей ми совести моей Духом Святым,

² яко скорбь ми есть велия и непрестающая болезнь сердцу моему:

³ молил бых ся бо сам аз отлучен быти от Христа по братии моей, сродницех моих по плоти,

⁴ иже суть Израилите, ихже всыновление и слава, и завети и законоположение, и служение и обетования:

⁵ ихже отцы, и от нихже Христос по плоти, сый над всеми Бог благословен во веки, аминь.

⁶ Не такоже, яко отпаде слово Божие: не вси бо сущии от Израиля, сии Израиль,

⁷ ни зане суть семя Авраамле, вси чада: но во Исааце, рече, наречется ти семя.

⁸ Сиречь, не чада плотская, сия чада Божия: но чада обетования причитаются в семя.

⁹ Обетования бо слово сие: на сие время прииду, и будет Сарре сын.

¹⁰ Не точию же, но и Ревекка от единаго ложа Исаака отца нашего имущи:

¹¹ еще бо не рождшымся, ни сотворившым что благо или зло, да по избранию предложение Божие пребудет

¹² не от дел, но от Призывающаго, речеся ей, яко болий поработает меншему,

¹³ якоже есть писано: Иакова возлюбих, Исава же возненавидех.

¹⁴ Что убо речем? Еда неправда у Бога? Да не будет.

¹⁵ Моисеови бо глаголет: помилую, егоже аще помилую, и ущедрю, егоже аще ущедрю.

¹⁶ Темже убо ни хотящаго, ни текущаго, но милующаго Бога.

¹⁷ Глаголет бо Писание фараонови: яко на истое сие воздвигох тя, яко да покажу тобою силу Мою и да возвестится имя Мое по всей земли.

¹⁸ Темже убо, егоже хощет, милует: а егоже хощет, ожесточает.

¹⁹ Речеши убо ми: чесо ради еще укоряет, воли бо Его кто противитися может?

²⁰ Темже убо, о, человече, ты кто еси, против отвещаяй Богови? Еда речет здание создавшему е: почто мя сотворил еси тако?

²¹ Или не имать власти скудельник на брении, от тогожде смешения сотворити ов убо сосуд в честь, ов же не в честь?

²² Аще же хотя Бог показати гнев Свой и явити силу Свою, пренесе во мнозе долготерпении сосуды гнева совершены в погибель:

²³ и да скажет богатство славы Своея на сосудех милости, яже предуготова в славу,

²⁴ ихже и призва нас не точию от Иудей, но и от язык:

²⁵ якоже и во Осии глаголет: нареку не люди Моя люди Моя, и невозлюбленую возлюблену:

²⁶ и будет, на месте, идеже речеся им: не людие Мои есте вы, тамо нарекутся сынове Бога живаго.

²⁷ Исаиа же вопиет о Израили: аще будет число сынов Израилевых яко песок морский, останок спасется:

²⁸ слово бо скончавая и сокращая в правде, яко слово сокращено сотворит Господь на земли,

²⁹ и якоже прорече Исаиа: аще не бы Господь Саваоф оставил нам семене, якоже Содом убо были быхом, и якоже Гоморру уподобилися быхом.

³⁰ Что убо речем, яко языцы, не гонящии правду, постигоша правду, правду же, яже от веры:

³¹ Израиль же, гоня закон правды, в закон правды не постиже.

³² Чесо ради? Зане не от веры, но от дел закона: преткнушася бо о камень претыкания,

³³ якоже есть писано: се, полагаю в Сионе камень претыкания и камень соблазна: и всяк веруяй в Онь не постыдится.