¹ ועתה קדם כל דבר אבקשה מכם לשאת תפלות ותחנונים ובקשות ותודות בעד כל בני אדם׃

² בעד המלכים וכל השליטים למען נחיה חיי השקט ובטח בכל חסידות וישר׃

³ כי כן טוב ורצוי בעיני אלהים מושיענו׃

⁴ אשר חפצו שיושעו כל בני האדם ויגיעו להכרת האמת׃

⁵ כי אחד הוא האלהים ואחד הוא העמד בין אלהים ובין בני אדם הוא בן אדם המשיח ישוע׃

⁶ אשר נתן את נפשו כפר בעד כל וזאת העדות הבאה בעתה׃

⁷ אשר אני הפקדתי לה לכרוז ולשליח אמת אני אמר במשיח ולא אשקר מורה הגוים באמונה ובאמת׃

⁸ לכן רצוני שיתפללו האנשים בכל מקום וישאו ידיהם קדש בלי כעס ומדון׃

⁹ וכן גם הנשים תתיפינה בתלבשת נאה עם בשת פנים וצניעות לא במחלפות הראש לא בזהב לא בפנינים ולא במלבושים יקרים׃

¹⁰ אלא כמו שהוא הגון לנשים אשר בחרו להן יראת אלהים במעשים טובים׃

¹¹ האשה תלמד דומם בכל הכנעה׃

¹² ואינני נתן רשות לאשה ללמד אף לא להתנשא על האיש אלא תדום׃

¹³ כי אדם נוצר בראשונה ואחריו חוה׃

¹⁴ ואדם לא נפתה כי האשה שמעה לקול המשיא ותבא לידי עברה׃

¹⁵ אבל תושע בלדתה בנים אם תעמדנה באמונה ובאהבה ובקדשה עם הצניעות׃