¹ Iet me i men panaui mas: Komail ngidingideki o kapakapki, o poekipoeki aramas akan karos, o wia danke.

² Kapakapaki nanmarki o saumas akan karos, pwe sen meleilei o insememau, wiawia me kon ong Kot o melel.

³ Pwe i me mau o kon ong atail Saunkamaur Kot,

⁴ Me kotin men, aramas akan karos en dorela o lolekong kila melel.

⁵ Pwe Kot me ta men o wilia patail me ta men nan pung en Kot o aramas akan, iet Aramas Kristus Iesus.

⁶ Me kotin wiala en aramas karos ar men pwaipwai, kadede en met, en lolok sili ni ansau me kon ong.

⁷ I me i wia kila saunkair o wanporon amen, i kin lokaia melel o so likam, o saunpadak ong men liki kan ni poson o melel.

⁸ I me i men, ol akan en kapakap ni wasa karos, ni ar pokada pa ar saraui, so makar o so peikasal.

⁹ Pil dueta li akan, ren kapwadeki likau makelekel o lelapok, o tiak mau, a kaidin ni ingid pit en monga, de kold, de manaman akan, de likau lingan,

¹⁰ A me kon ong li akan, me men kasaleda ar masak Kot ni ar wiawia mau kan.

¹¹ Li akan en nenenla, ap padapadakki ni tiak en impimpai.

¹² I sota mueid ong li amen, en wiada padak, de kaunda ol, a en nenenla.

¹³ Pwe Adam me wiauier mas, a muri Ewa.

¹⁴ A kaidin Adam, me katiamaula, a li o me katiamaular, ap pupedi ni me sapung.

¹⁵ A a pan dorela ni a naitik ma a pan podidi ong poson, o limpok, o saraui, o tiak mau.