¹ Quid ergo amplius Iudæo est? aut quæ utilitas circumcisionis?

² Multum per omnem modum. Primum quidem quia credita sunt illis eloquia Dei.

³ quid enim si quidam illorum non crediderunt? Numquid incredulitas illorum fidem Dei evacuabit? Absit.

⁴ Est autem Deus verax: omnis autem homo mendax, sicut scriptum est: Ut iustificeris in sermonibus tuis: et vincas cum iudicaris.

⁵ Si autem iniquitas nostra iustitiam Dei commendat, quid dicemus? Numquid iniquus est Deus, qui infert iram?

⁶ (secundum hominem dico.) Absit. alioquin quomodo iudicabit Deus hunc mundum?

⁷ Si enim veritas Dei in meo mendacio abundavit in gloriam ipsius: quid adhuc et ego tamquam peccator iudicor?

⁸ et non (sicut blasphemamur, et sicut aiunt quidam nos dicere) faciamus mala ut veniant bona: quorum damnatio iusta est.

⁹ Quid ergo? præcellimus eos? Nequaquam. Causati enim sumus Iudæos, et Græcos omnes sub peccato esse,

¹⁰ sicut scriptum est: Quia non est iustus quisquam:

¹¹ non est intelligens, non est requirens Deum.

¹² Omnes declinaverunt, simul inutiles facti sunt, non est qui faciat bonum, non est usque ad unum.

¹³ Sepulchrum patens est guttur eorum, linguis suis dolose agebant: Venenum aspidum sub labiis eorum:

¹⁴ Quorum os maledictione, et amaritudine plenum est:

¹⁵ Veloces pedes eorum ad effundendum sanguinem:

¹⁶ Contritio, et infelicitas in viis eorum:

¹⁷ et viam pacis non cognoverunt:

¹⁸ Non est timor Dei ante oculos eorum.

¹⁹ Scimus autem quoniam quæcumque lex loquitur, iis, qui in lege sunt, loquitur: ut omne os obstruatur, et subditus fiat omnis mundus Deo:

²⁰ quia ex operibus legis non iustificabitur omnis caro coram illo. Per legem enim cognitio peccati.

²¹ Nunc autem sine lege iustitia Dei manifestata est: testificata a lege et Prophetis.

²² Iustitia autem Dei per fidem Iesu Christi in omnes, et super omnes, qui credunt in eum: non enim est distinctio:

²³ Omnes enim peccaverunt, et egent gloria Dei.

²⁴ Iustificati gratis per gratiam ipsius, per redemptionem, quæ est in Christo Iesu,

²⁵ quem proposuit Deus propitiationem per fidem in sanguine ipsius, ad ostensionem iustitiæ suæ propter remissionem præcedentium delictorum

²⁶ in sustentatione Dei, ad ostensionem iustitiæ eius in hoc tempore: ut sit ipse iustus, et iustificans eum, qui est ex fide Iesu Christi.

²⁷ Ubi est ergo gloriatio tua? Exclusa est. Per quam legem? Factorum? Non: sed per legem fidei.

²⁸ Arbitramur enim iustificari hominem per fidem sine operibus legis.

²⁹ An Iudæorum Deus tantum? Nonne et Gentium? Immo et Gentium.

³⁰ Quoniam quidem unus est Deus, qui iustificat circumcisionem ex fide, et præputium per fidem.

³¹ Legem ergo destruimus per fidem? Absit: sed legem statuimus.