¹ Отложше убо всяку злобу и всяку лесть и лицемерие и зависть и вся клеветы,

² яко новорождени младенцы, словесное и нелестное млеко возлюбите, яко да о нем возрастете во спасение:

³ понеже вкусисте, яко благ Господь.

⁴ К Немуже приходяще, камени живу, от человек убо уничижену, от Бога же избрану, честну,

⁵ и сами яко камение живо зиждитеся во храм духовен, святителство свято, возносити жертвы духовны, благоприятны Богови Иисус Христом.

⁶ Зане писано есть в Писании: се полагаю в Сионе камень краеуголен, избран, честен: и веруяй вонь не постыдится.

⁷ Вам убо честь верующым, а противящымся камень, егоже небрегоша зиждущии, сей бысть во главу угла, и камень претыкания и камень соблазна:

⁸ о немже и претыкаются слову противляющиися, на неже и положени быша.

⁹ Вы же род избран, царское священие, язык свят, людие обновления, яко да добродетели возвестите из тмы вас Призвавшаго в чудный Свой свет:

¹⁰ иже иногда не людие, ныне же людие Божии: иже не помиловани, ныне же помиловани бысте.

¹¹ Возлюбленнии, молю яко пришелцев и странников, огребатися от плотских похотей, яже воюют на душу,

¹² житие ваше имуще добро во языцех, да о немже клевещут вас аки злодеев, от добрых дел видевше, прославят Бога в день посещения.

¹³ Повинитеся убо всякому человечу созданию Господа ради: аще царю, яко преобладающу:

¹⁴ аще ли же князем, яко от него посланным, во отмщение убо злодеем, в похвалу же благотворцем.

¹⁵ Яко тако есть воля Божия, благотворящым обуздовати безумных человек невежство:

¹⁶ яко свободни, а не яко прикровение имуще злобы свободу, но яко раби Божии.

¹⁷ Всех почитайте, братство возлюбите, Бога бойтеся, царя чтите.

¹⁸ Раби, повинуйтеся во всяцем страсе владыкам, не токмо благим и кротким, но и строптивым.

¹⁹ Се бо есть угодно пред Богом, аще совести ради Божия терпит кто скорби, стражда без правды.

²⁰ Кая бо похвала, аще согрешающе мучими терпите? Но аще добро творяще и страждуще терпите, сие угодно пред Богом,

²¹ на сие бо и звани бысте: зане и Христос пострада по нас, нам оставль образ, да последуем стопам Его:

²² иже греха не сотвори, ни обретеся лесть во устех Его:

²³ иже укаряемь противу не укаряше, стражда не прещаше, предаяше же Судящему праведно:

²⁴ иже грехи нашя Сам вознесе на теле Своем на древо, да от грех избывше, правдою поживем: Егоже язвою изцелесте.

²⁵ Бесте бо яко овцы заблуждшыя не имущя пастыря: но возвратистеся ныне к Пастырю и Посетителю душ ваших.