¹ La trian tagon okazis edziĝo en Kana Galilea, kaj la patrino de Jesuo ĉeestis tie;

² ankaŭ Jesuo kaj liaj disĉiploj estis invititaj al la edziĝo.

³ Kaj kiam mankis vino, la patrino de Jesuo diris al li: Ili ne havas vinon.

⁴ Kaj Jesuo diris al ŝi: Kio estas inter mi kaj vi, virino? mia horo ankoraŭ ne venis.

⁵ Lia patrino diris al la servantoj: Kion ajn li diros al vi, tion faru.

⁶ Kaj estis tie ses akvokuvoj ŝtonaj, metitaj laŭ la purigo de la Judoj, enhavantaj po du ĝis tri metretoj.

⁷ Jesuo diris al ili: Plenigu la akvokuvojn per akvo. Kaj oni plenigis ilin ĝis la rando.

⁸ Kaj li diris al ili: Ĉerpu nun, kaj alportu al la festenestro. Kaj oni alportis.

⁹ Kiam la festenestro gustumis la akvon, nun fariĝintan vino, kaj ne sciis, de kie ĝi estas (sciis tamen la servantoj, kiuj ĉerpis la akvon), la festenestro alvokis la fianĉon,

¹⁰ kaj diris al li: Ĉiu homo prezentas unue la bonan vinon, kaj kiam oni jam drinkis, tiam la malpli bonan; sed vi rezervis la bonan vinon ĝis nun.

¹¹ Ĉi tiun komencon de signoj Jesuo faris en Kana Galilea, kaj elmontris sian gloron, kaj liaj disĉiploj kredis al li.

¹² Post tio li malsupreniris al Kapernaum, kaj kun li lia patrino kaj liaj fratoj kaj liaj disĉiploj; kaj tie ili restis ne multajn tagojn.

¹³ Kaj la Pasko de la Judoj alproksimiĝis, kaj Jesuo supreniris al Jerusalem.

¹⁴ Kaj li trovis en la templo vendistojn de bovoj kaj ŝafoj kaj kolomboj, kaj la monŝanĝistojn sidantajn;

¹⁵ kaj farinte skurĝon el ŝnuretoj, li elpelis ĉiujn el la templo, ŝafojn kaj bovojn; kaj elŝutis la monerojn de la monŝanĝistoj kaj renversis la tablojn;

¹⁶ kaj al la vendistoj de la kolomboj li diris: Forportu tion de ĉi tie; ne faru la domon de mia Patro domo de komerco.

¹⁷ La disĉiploj rememoris, ke estis skribite: Fervoro pri Via domo min konsumis.

¹⁸ La Judoj do respondis kaj diris al li: Kian signon vi montras al ni, ĉar vi faras tion?

¹⁹ Respondis Jesuo kaj diris al ili: Detruu ĉi tiun sanktejon, kaj mi levos ĝin en la daŭro de tri tagoj.

²⁰ La Judoj diris: Kvardek ses jarojn ĉi tiu sanktejo estis konstruata; ĉu vi levos ĝin en la daŭro de tri tagoj?

²¹ Sed li parolis pri la sanktejo de sia korpo.

²² Kiam do li leviĝis el la mortintoj, la disĉiploj rememoris, ke li diris tion; kaj ili kredis la Skribon, kaj la vorton, kiun Jesuo diris.

²³ Kaj kiam li estis en Jerusalem ĉe la Pasko, dum la festo, multaj fidis al lia nomo, vidante la signojn, kiujn li faris.

²⁴ Sed Jesuo ne konfidis sin al ili, ĉar li konis ĉiujn,

²⁵ kaj ne bezonis, ke iu atestu pri la homo, ĉar li mem sciis, kio estas en la homo.