¹ A NI kasilu en ran kamadip en kapapaud wiaui Kana nan Kaliläa; a in en Iesus kot wasa o.

² Iesus o sapwilim a tounpadak kan me pil luke dong kamadip o.

³ Arail wain lao roselar, in en Iesus ap masani ong i: Solar arail wain.

⁴ Iesus kotin masani ong i: Li, menda re om? Ai ansau saikenta leler.

⁵ In a ap masani ong papa kan: Komail wiada meakaros, me a pan kotin masani ong komail.

⁶ Ari, potel takai wonu mi wasa o, en Sus akan ar men dopedop lole. Eu me laude ong metreten riau de silu.

⁷ Iesus kotin masani ong irail: Komail idip ong pil en potel akan! Irail ari kodiada lel au ar.

⁸ A ap kotin masani ong irail: Deukada, wala ren me kaun en konot: Irail ap wala.

⁹ Kaun en konot lao song kis pil, me wia wain la, o so asa, a idipi sang ia, a papa kan, me idip pil da, asa. Kaun en konot ap ekeredo ol kamod o,

¹⁰ Indang i: Aramas karos kin kida mas wain mau, toun kamadip lao medilar, re kin kida, me sota non mau. A komui kin nekinekid wain mau lel met.

¹¹ I met tapidan kilel akan, me Iesus kotin wiadar Kana nan Kaliläa, o kotin kasaleda a lingan, o sapwilim a tounpadak kan posonla i.

¹² A murin met a kotidilang Kapernaum, i o in a, o ri a ol akan, o sapwilim a tounpadak kan, ari, sota non ran toto, me re kotikot wasa o.

¹³ A pasa en Sus akan me korendor, a Iesus kotidalang Ierusalem.

¹⁴ A kotin masani nan im en kaudok men netinet en kau, o sip, o muroi, o men wiliandi moni me momod ia.

¹⁵ Ap kotin wiakida men wokiwok sal akai, ap woki ir sang nan im en kaudok iangaki sip o kau akan, o moni en saunwiliandi a kotin kasapokela o kotin wukedidi tepel akan.

¹⁶ Ap kotin masani ong men netinet en muroi kan: Wawei sang met met akan, o der wiakidar tanpas en Sam ai im en net eu!

¹⁷ A sapwilim a tounpadak kan tamanda me intingidier: Limpok ong tanpas omui me kasor ia dier.

¹⁸ Sus oko ap sapeng indang i: Kilel da, me kom kadedeki ong kit, me komui manaman ong, en wiada mepukat?

¹⁹ Iesus kotin sapeng masani ong irail: Palanga pasang im en kaudok wet, a pong sili pong I pan kauada.

²⁰ Sus oko ap indada: Par ngaulwonu me im en kaudok wet wiaui kidar, a pong sili pong komui pan kaua kida?

²¹ Ari, tanpas en pali war a, me a kotin masanie kida.

²² A lao iasadar sang a matalar, sapwilim a tounpadak kan ap tamandar, me a kotin masanier mepukat. Irail ari poson kisin likau kan o masan, me Iesus kotin masaniadar.

²³ Ni a kotikot Ierusalem ni pasa, ni kamadip o, me toto posonla mar a, ni ar kilanger kilel akan, me a kotin wiadar.

²⁴ A Iesus sota kotin liki ong ir pein i, pwe a kotin mangi irail karos.

²⁵ O a sota mau ong, meamen en kadede ong i aramas amen, pwe pein i kotin mangi lol en aramas.