¹ KAUN lao kotin mangi, me Parisär akan rongadar, me Iesus kin wiada tounpadak kan o paptais toto sang Ioanes,

² Ari, pwe sota me pein Iesus kotin paptais, sapwilim a tounpadak kan ta,

³ Ap kotila sang Iudäa, kotin purelang Kaliläa.

⁴ A a kotin weid nan wein Samaria.

⁵ I ap kotilang kanim en Samaria eu, me adaneki Sikar, koren iong sap, me Iakop ki ong na ol Iosep.

⁶ Iei wasa en Iakop a parer eu mia. Iesus ari ngirekila a sapasapal, ap kaipokedi pon parer o, ari mepukat wiauier impan auer kawonu.

⁷ A li en Samaria amen ap kodon idip pil ia. Iesus kotin masani ong i: Kido lim ai kis pil en!

⁸ Pwe sapwilim a tounpadak kan ko ong nan kanim, pan netiada sak arail.

⁹ Li en Samaria ap indang i: Iaduen, komui kisan men Sus, ap poeki pil re i? Pwe ngai li en Samaria amen, pwe Sus akan sota kin waroki ong men Samaria.

¹⁰ Iesus kotin sapeng masani ong i: Ma koe asa duen kisakis sang ren Kot o is i, me indang uk: Kido lim ai kis pil en, koe pan poeki re a, a ap pan ki ong uk pil memaur.

¹¹ Li o indang i: Maing, sota sapwilim omui men idip pil, a parer me lol, a ia wasa, kom pan idip sang ia pil memaur?

¹² De komui lapa sang sam at Iakop, me kotiki ong kit er parer en, o pein nima sang, o na kan, o na man akan?

¹³ Iesus kotin sapeng masani ong i: Karos, me nima sang pil wet, pan pur ong men nim pilada.

¹⁴ A meamen, me nima sang pil, me I ki ong i, pan solar men nim pilada kokolata, pwe pil, me I kin ki ong, pan pot loli kusukusudang maur soutuk.

¹⁵ Li o ap indai ong i: Maing, kom kotiki ong ia kisan pil o, pwe i en solar men nim pil, o solar kodo o idipa sang met!

¹⁶ Iesus kotin masani ong i: Kowei ukedo om paud!

¹⁷ Li o sapeng indada: Sota ai paud. Iesus kotin masani ong i: Melel om lokaia: Sota ai paud.

¹⁸ Pwe om paud me limen mas kokodo, a kaidik om paud, me koe paudeki met; iei melel, me koe indada.

¹⁹ Li o indang i: Maing, i ap asaer, me saukop amen komui.

²⁰ Sam at akan kaukaudok pon nana wet, a komail kin inda dene Ierusalem eta wasa me aramas en kaudok ia.

²¹ Iesus kotin masani ong i: Li, kamelele ia, a korendor ansaun omail pan solar kaukaudok ong Sam pon nana wet, pil sota Ierusalem.

²² Komail kin sasa, me komail kin kaukaudok ong. A kit asa, me se kaukaudok ong, pwe kamaur pwarado sang ren men Sus akan.

²³ A ansau korendor, ari a leler, me toun kaudok melel akan pan kaudok ong Sam ni Ngen o melel, pwe iei ta song en toun kaudok kan, me Sam pil kotin kupura.

²⁴ Ngen eu Kot, a me kaudok ong i, ren kaudokki Ngen o melel.

²⁵ Li indai ong i: I asa, me Mesias pan kotido, me maraneki Kristus. I lao kotido, a pan katiti ong kit meakaros.

²⁶ Iesus kotin masani ong i: Ngai i, me lokelokaia ong uk.

²⁷ A sapwilim a tounpadak kan ap purodo, puriamui a masan ong li amen. Ari so, sota me indada: Da me re kotin kainoma, de da me re kotin mamasani ong i?

²⁸ Li o ap pwilikidi potel en pil o, ap koieilang kanim o kasoi ong aramas akan:

²⁹ Kodo, kilang aramas amen, me kasale ong ia karos, me i wiadar, ma i kaidin Kristus?

³⁰ Rap koieila sang nan kanim o potodo re a.

³¹ Ni ansau ota sapwilim a tounpadak kan poeki re a, potoan ong: Rapi, re kotin konot!

³² A kotin masani ong irail: Kan ai kisin manga mia, me komail sasa.

³³ Tounpadak kan ap kasokasoi nan pung arail: Muein amen wa dong i sak.

³⁴ Iesus kotin masani ong irail: Wiawia kupur en me kadar ia do, o kapwaiada sapwilim a dodok, iei kan ai,

³⁵ Komail sota kin indada: Saunipong paieu mi mon rak? Kilan, I indai ong komail, sarada, kilang matuel o pwe a malar.

³⁶ Me dolung kin pwaipwai o nanak ong maur soutuk, pwe ira karos, me kamorok o me dolung en peren pena.

³⁷ Pwe ni mepukat kasoi o pwaidar: Amen me kin kamokamorok, a amen me kin dolung.

³⁸ I kadar komail wei, en dolung pena, me komail so doke, Akai me dodoker, a komail me id aneki arail rak.

³⁹ Men Samaria toto kisan kanim o posonla i pweki kasoi en li o, me kadede: A kotin kasale ong ia karos, me i wiadar.

⁴⁰ Men Samaria kan lao pokon dong i, rap poeki re a, en kotikot re ’rail. I ari kotikot ia pong ria pong.

⁴¹ A me toto me posonlar pweki a masan,

⁴² Ap indang li o: Se poson kila kaidin om kasoi, pwe se pein rongadar o weweki, me i melel Saunkamaur pan sappa.

⁴³ Murin ran riau Iesus kotila sang wasa o, kotilang Kaliläa.

⁴⁴ Pwe pein Iesus kotin kadedeki, me saukop amen sota kin mau nan udan sap we.

⁴⁵ A lao kotilang Kaliläa, men Kaliläa me kasamo i, pwe re iang kilanger me a kotin wiadar Ierusalem ni kamadip o, pwe re toun iang kamadip.

⁴⁶ Iesus ari kotin pure dong Kana nan Kaliläa, wasa a kotin kapikila pil wain. A monsap amen mia, me na ol somau nan Kapernaum.

⁴⁷ A lao rongadar, me Iesus koti dong Kaliläa sang Iudäa, ap poto dong re a, poeki i en kotidi, kakelada na ol, pwe a koren iong mela.

⁴⁸ Iesus ap kotin masani ong i: Ma komail so kilang kilel o manaman akan komail sota pan poson.

⁴⁹ Monsap potoan ong i: Maing kotidi mon nai seri mela!

⁵⁰ Iesus kotin masani ong i: U kowei, noum ol memaur. Ari aramas o poson masan o, me Iesus kotin masani ong i ap koieila.

⁵¹ A ni a kodila, a ladu kan me tu ong i, kasoi ong i, me na putak mauredar.

⁵² I ap kalelapok re ’rail: Ansau da me a pikikidi maur? Irail indang i: Aio ni auer kaisu karakar ko sanger.

⁵³ Sam o ap asadar, me i ansau, me Iesus kotin masani ong i: Noum ol memaur. I ari o na kan me posonla i.

⁵⁴ Iet kilel kariau, me Iesus kotin wiadar ni a koti dong Kaliläa sang Iudäa.