¹ MURIN mepukat Iesus kotin kakan sili Kaliläa, pwe a solar men kakan sili Iudäa, pweki Sus oko masamasan kamatala i.

² A ran lapalap en Sus oko; iei ran en im en tan tuka korendor.

³ Ri a ol akan ap indai ong i: Kom kotiwei kotilang Iudäa, pwe omui tounpadak kan en pil udial omui wiawia kan, me kom kin wiawia.

⁴ Pwe sota me kin wiada meakot wasa rir, ma a men indand sili. Ma komui wia mepukat, en kasansale ong sappa.

⁵ Pwe ri a ol akan pil sota poson i.

⁶ Iesus ap kotin masani ong irail: Ai ansau saikenta leler, a omail ansau mia ansau karos.

⁷ Sappa sota kak kailongki komail, a ngai me a kin kailongki, aki I kin kadede, me a wiawia kan me sued.

⁸ Komail kodalang kamadip et, I sota pan kodalang kamadip et, pwe ai ansau saikenta leler.

⁹ A kotin masani ong irail mepukat, ap kotikotita Kaliläa.

¹⁰ A ri a ol akan lao samalar, i ap pil kotidalang kamadip, ap so sansal a duen me rir.

¹¹ Sus akan ari rapaki i ni kamadip o indada: Ari, ia wasa a kotikot ia?

¹² A aramas akan lokolokaia toto duen i, pwe akai indada: Me mau men. A akai me indada: Kaidin, pwe a kin kaweid sapung aramas.

¹³ Sota me lokaia sansal duen i, pweki ar masak Sus oko.

¹⁴ Lao lel ailepan kamadip o, Iesus ap kotin kodalang im en kaudok o kaukaweweda.

¹⁵ A Sus akan ap puriamui kila indada: Da duen men et asa wewe en kisin likau, pwe a sota iang padakki.

¹⁶ Iesus ap kotin sapeng irail masani: Kaidin ai padak, me I kin kida a en me kadar ia do.

¹⁷ Meamen wiawia kupur a, pan weweki ai padak, ma a ren Kot, de sang ren pein ngai.

¹⁸ Me kin padapadak sang ni pein i, kin rapaki pein wau i, a me kin rapaki wau en me kadarala i, iei me melel o sota man sued kot pit.

¹⁹ Kaidin Moses, me ki ong komail kapung o, a sota amen komail kin kapwaiada kapung o? A da me komail rapakiki kame ia la?

²⁰ Aramas oko sapeng indada: Koe me tanwar en tewil, is me rapaki kame uk ala?

²¹ Iesus kotin sapeng masani ong irail: Dok taieu, me I wiadar, a komail puriamui kila.

²² Moses ki ong komail er sirkomsais, a kaidin tapi sang ren Moses, pwe sang ren sam akan, a komail kin sirkomsais aramas ni ran en sapat.

²³ Ari ma aramas amen ale sirkomsais ni ran en sapat, pwe kapung en Moses ender sapungala, a komail kin suede kin ia, pweki ai kakelailada aramas pon ni ran en sapat?

²⁴ Der kadeikada duen pali liki, a komail kasaui nin tiak en kadeik pung.

²⁵ Men Ierusalem kai ap inda: Kaidin i, me re raparapaki en kamela?

²⁶ A kilang, a padapadak sansal, a re sota man lokaia ong i, de muein saumas akan asaer mau, me i Kristus?

²⁷ Ari, se asaer, wasa men et ko sang ia, a Kristus lao kotido sota me pan asa wasa, me a pwarado sang ia.

²⁸ Iesus ap kotin kapitie laudeda kawewe nan im en kaudok masani: Komail asa ia o wasa I ko sang ia. Ari, kaidin pein ngai, me I kokido, a me kadar ia dor, me melel, me komail sasa.

²⁹ A I asa i, pwe I kodo sang re a, o i me kadar ia dor.

³⁰ Irail ap song saikidi i, a sota me sair i, pwe a ansau kaikenta leler,

³¹ Aramas toto sang nan pokon o posonla i indada: Iaduen, Kristus lao pwarado, a pan wia kilel toto sang mepukat, me men et wiadar?

³² Parisär akan rongadar, me aramas akan lokelokaia mepukat duen i. Samero lapalap o Parisär akan ap kadarala papa kan, en saikidi i.

³³ Iesus ap kotin masani: I pan mi re omail ansau motomot. I ap pan kola ren me kadar ia do.

³⁴ Komail pan rapakin ia, ap sota diar, a wasa, me I pan mi ia, komail sota pan kak ong.

³⁵ Sus oko ap inda nan pung arail: A pan kola ia, pwe sen solar diar i? A pan kola ren me salongalar ren men Krik kan, kaukawewe ong men Krik?

³⁶ Iaduen masan en, me a indada: Komail pan rapakin ia, ap sota diar, a wasa, me I pan mi ia, komail sota pan kak ong?

³⁷ Ni ran en kamadip a nikilar, ni ran lapalap o, Iesus kotida, kapitie laudeda masani: Meamen men nim piladar, i en ko dong ia nim.

³⁸ Me poson ia, duen kisin likau kan indada, sang nan war a pil memaur pan pwilipwili sang ia.

³⁹ Mepukat a kotin masani duen Ngen, me irail, me poson i, en tungole; pwe Ngen saikenta pakadarado, aki Iesus saikenta linganlar.

⁴⁰ Ari, akai sang nan pokon o ni ar rongadar masan pukat ap indada: Melel Saukop o.

⁴¹ A akai indada: Kristus men et! A akai indada: Da, Kristus pan pwarado sang Kaliläa?

⁴² Kaidin kisin likau me inda, me Kristus pan wan Dawid o kisan men Petleem, kanim o, me Dawid kotikot ia?

⁴³ Irail ap liak toror pasang pweki i.

⁴⁴ A akai men saikidi i, a sota me sair i.

⁴⁵ A papa ko ap pure dong ren samero lapalap o Parisär akan. Irail ari idok re irail: Da me komail sota wakido?

⁴⁶ A papa ko sapeng: Sota man aramas amen padapadak duen men et.

⁴⁷ Parisär oko ap sapeng irail: Komail pil pakodauelar?

⁴⁸ Iaduen saumas de Parisär amen posonla i?

⁴⁹ A aramas pukat, me so asa kapung o, re rialar.

⁵⁰ Nikodemus kis arail ap indang irail:

⁵¹ Iaduen, atail kapung pil kin kadeikada aramas amen mon a rong o asa sang pein i duen a wiawia?

⁵² Irail sapeng indang i: Iaduen, komui pil kisan men Kaliläa? Rapaki o kilang, me sota saukop amen ko sang Kaliläa.

⁵³ Amen amen ap purelang deu a.