¹ אחרי הדברים האלה הלך ישוע בארץ הגליל הלוך ועבור כי לא אבה להתהלך ביהודה על אשר בקשו היהודים להרגו׃

² ויקרב חג היהודים הוא חג הסכות׃

³ ויאמרו אליו אחיו קום ולך מזה ארצה יהודה למען יראו גם תלמידיך את המעשים אשר אתה עשה׃

⁴ כי לא יעשה איש דבר בסתר והוא חפץ להתפרסם לכן אם אתה עשה כאלה הגלה אל העולם׃

⁵ כי אחיו גם הם לא האמינו בו׃

⁶ ויאמר אליהם ישוע עתי לא באה עד עתה ועתכם תמיד נכונה׃

⁷ לא יוכל העולם לשנוא אתכם ואתי ישנא באשר אני מעיד עליו כי רעים מעלליו׃

⁸ עלו אתם לחג את החג אני לא אעלה אל החג הזה כי עתי לא מלאה עד עתה׃

⁹ כזאת דבר וישב בגליל׃

¹⁰ ויהי כאשר עלו אחיו לרגל ויעל גם הוא לא בגלוי כי אם כמסתתר׃

¹¹ והיהודים בקשהו בחג ויאמרו איה הוא׃

¹² ותהי תלונה רבה על אדותיו בתוך העם אלה אמרו טוב הוא ואלה אמרו לא כי מתעה הוא את העם׃

¹³ אך אין איש מדבר עליו בגלוי מפני יראת היהודים׃

¹⁴ ויהי בחצי ימי החג עלה ישוע אל המקדש וילמד׃

¹⁵ ויתמהו היהודים ויאמרו איך ידע זה ספר והוא לא למד׃

¹⁶ ויען אתם ישוע ויאמר לקחי לא שלי הוא כי אם לאשר שלחני׃

¹⁷ האיש החפץ לעשות רצונו ידע לקחי אם מאת אלהים הוא ואם מנפשי אדבר׃

¹⁸ המדבר מנפשי כבוד עצמו יבקש אבל המבקש כבוד שלחו נאמן הוא ואין עולתה בו׃

¹⁹ הלא משה נתן לכם את התורה ואין איש מכם עשה התורה מדוע תבקשו להרגני׃

²⁰ ויען העם ויאמר שד בקרבך מי מבקש להרגך׃

²¹ ויען ישוע ויאמר להם פעלה אחת פעלתי וכלכם עליה תתמהו׃

²² משה נתן לכם המילה אך לא ממשה היא כי אם מן האבות וביום השבת תמולו כל זכר׃

²³ ועתה אם ימול זכר בשבת למען אשר לא תופר תורת משה מה תקצפו עלי כי רפאתי איש כלו בשבת׃

²⁴ אל תשפטו למראה עין כי אם משפט צדק שפטו׃

²⁵ ויאמרו אנשים מישבי ירושלים הלא זה הוא אשר בקשו להמיתו׃

²⁶ והנה הוא דבר בגלוי ולא יגערו בו האף אמנם ידעו ראשינו כי באמת זה הוא המשיח׃

²⁷ אך את זה ידענו מאין הוא וכאשר יבוא המשיח לא ידע איש אי מזה הוא׃

²⁸ אז קרא ישוע במקדש וילמד לאמר הן ידעתם אתי אף ידעתם מאין אני ומנפשי לא באתי אכן יש אמתי אשר שלחני ואתו לא ידעתם׃

²⁹ ואני ידעתיו כי מאתו אני והוא שלחני׃

³⁰ ויבקשו לתפשו ואיש לא שלח בו יד כי לא בא עתו׃

³¹ ורבים מן העם האמינו בו ויאמרו אם יבא המשיח הגם יעשה אתות רבות מאשר עשה זה׃

³² והפרושים שמעו את העם מתלחשים עליו כזאת וישלחו הפרושים וראשי הכהנים משרתים לתפשו׃

³³ ויאמר אליהם ישוע אך למצער עודני עמכם והלכתי אל אשר שלחני׃

³⁴ תשחרנני ולא תמצאנני ובאשר אני שם אתם לא תוכלו לבוא׃

³⁵ ויאמרו היהודים איש רעהו אנה ילך זה ואנחנו לא נמצאהו הכי ילך אל הנפוצים בין היונים וילמד אנשי יון׃

³⁶ מה זה הדבר אשר אמר תשחרנני ולא תמצאנני ובאשר אני שם אתם לא תוכלו לבוא׃

³⁷ ויהי ביום החג האחרון הגדול עמד ישוע ויקרא לאמר איש כי יצמא יבא נא אלי וישתה׃

³⁸ המאמין בי כדבר הכתוב מבטנו ינהרו נהרי מים חיים׃

³⁹ וזאת אמר על הרוח אשר יקחהו המאמינים בו כי לא נתן רוח הקדש עדנה יען אשר ישוע עוד לא נתפאר׃

⁴⁰ ורבים מהמון העם כשמעם את הדבר הזה אמרו אכן זה הוא הנביא׃

⁴¹ ויש אשר אמרו זה הוא המשיח ואחרים אמרו המן הגליל יבא המשיח׃

⁴² הלא הכתוב אמר כי מזרע דוד ומכפר בית לחם מקום דוד יצא המשיח׃

⁴³ ותהי מחלקת בתוך העם על אדותיו׃

⁴⁴ ומקצתם רצו לתפשו ואיש לא שלח בו יד׃

⁴⁵ וישובו המשרתים אל הכהנים הגדולים והפרושים והמה אמרו אליהם מדוע לא הבאתם אתו׃

⁴⁶ ויענו העבדים מעולם לא דבר איש כאיש הזה׃

⁴⁷ ויאמרו אליהם הפרושים הכי נדהתם גם אתם׃

⁴⁸ הגם האמין בו איש מן השרים או מן הפרושים׃

⁴⁹ רק ההמון הזה אשר אינם ידעים את התורה ארורים המה׃

⁵⁰ ויאמר אליהם נקדימון אשר בא אליו בלילה והוא היה אחד מהם׃

⁵¹ התשפט תורתנו איש בטרם תחקרהו לדעת את אשר עשה׃

⁵² ויענו ויאמרו אליו הגם אתה מן הגליל דרש נא וראה כי לא קם נביא מן הגליל׃

⁵³ וילכו איש איש לביתו׃