¹ Eg legg eit godt ord inn for Føbe, syster vår, som er tenar for kyrkjelyden i Kenkreæ,

² at de tek imot henne i Herren, som det sømer dei heilage, og hjelper henne med alt som ho treng av dykk; for ho hev vore til hjelp for mange, ja for meg sjølv og.

³ Helsa Priska og Akvilas, mine medarbeidarar i Kristus Jesus -

⁴ dei hev våga sitt eige liv for meg, og ikkje berre eg takkar deim, men og alle kyrkjelydar av heidningarne -

⁵ og helsa kyrkjelyden i deira hus. Helsa Epænetus, min kjære, som er fyrstegrøda av Asia for Kristus.

⁶ Helsa Maria, som hev arbeidt mykje for dykk.

⁷ Helsa Andronikus og Junias, mine skyldfolk og medfangar, dei er namngjetne millom apostlarne, og dei kom og til Kristus fyre meg.

⁸ Helsa Amplias, min kjære bror i Herren.

⁹ Helsa Urbanus, vår medarbeidar i Kristus, og min kjære Stakys.

¹⁰ Helsa Apelles, den velrøynde i Kristus. Helsa deim som høyrer til Aristobulus’ hus.

¹¹ Helsa Herodion, skyldingen min. Helsa deim frå Narkissus’ hus, som er i Herren.

¹² Helsa Tryfæna og Tryfosa, som hev arbeidt i Herren. Helsa Persis, den kjære, ho hev arbeidt mykje i Herren.

¹³ Helsa Rufus, den utvalde i Herren, og hans og mi mor.

¹⁴ Helsa Asynkritus, Flegon, Hermes, Patrobas, Hermas og brørne hjå deim.

¹⁵ Helsa Filologus og Julia, Nereus og syster hans og Olympas og alle dei heilage som er hjå deim.

¹⁶ Helsa kvarandre med ein heilag kyss! Alle Kristi kyrkjelydar helsar dykk.

¹⁷ Men eg legg dykk på hjarta, brør, at de hev augo med deim som veld usemja og støytarne mot den læra som de hev lært, og haldt dykk ifrå deim.

¹⁸ For slike folk tener ikkje vår Herre Jesus Kristus, men sin eigen buk, og med sine fagre ord og sin smeikjande tale dårar dei hjarto på dei godtrugne.

¹⁹ For ordet um dykkar lydnad er kome utyver til alle; difor gled eg meg yver dykk, men eg ynskjer at de skal vera vise til det gode og reine for det vonde.

²⁰ Men fredsens Gud skal brått krasa Satan under føterne dykkar! Vår Herre Jesu Kristi nåde vere med dykk!

²¹ Timoteus, min medarbeidar, og Lukius og Jason og Sosipater, skyldingarne mine, helsar dykk.

²² Eg, Tertius, som skriv brevet, helsar dykk i Herren.

²³ Gaius helsar dykk, han som er vert for meg og heile kyrkjelyden. Erastus, rekneskapsføraren i byen, helsar dykk, og broderen Kvartus.

²⁴ Vår Herre Jesu Kristi nåde vere med dykk alle! Amen.

²⁵ Men han som er megtig til å styrkja dykk etter mitt evangelium og Jesu Kristi forkynning, etter openberringi av den løyndomen som hev vore duld i ævelege tider,

²⁶ men no er komen til synes, og i profetiske skrifter etter den ævelege Guds fyresegn kunngjord for alle folk til å verka lydnad i tru,

²⁷ han, den eine vise Gud ved Jesus Kristus, skal hava æra i all æva! Amen.