¹ ואתה דבר את הנאה ללקח הבריא׃

² שיהיו הזקנים משלים ברוחם ומכבדים וצנועים ובריאים באמונה ובאהבה ובסבלנות׃

³ וכן הזקנות תהי הנהגתן כאשר נאוה לקדש לא תהיינה מלשינות ולא נכבשות לסבוא יין כי אם מלמדות טוב׃

⁴ ומישרות את הצעירות לאהב את בעליהן ולאהב את בניהן׃

⁵ ולהיות צנועות וטהרות צופיות הליכות ביתן וטבות ונכנעות לבעליהן למען לא יחלל דבר האלהים׃

⁶ ככה תזהיר גם את הבחורים שיהיו צנועים׃

⁷ ובכל דבר היה אתה למופת במעשים טובים בהוראה צרופה ונהדרה׃

⁸ ובדבר בריא ומום אין בו למען יבוש המתקומם ולא ימצא לדבר עליכם רע׃

⁹ העבדים יכנעו לאדניהם ויתרצו להם בכל דבר ולא ימרו את דבריהם׃

¹⁰ ולא ימעלו מעל כי אם יראו כל אמונה טובה למען יפארו בכל את לקח אלהינו מושיענו׃

¹¹ כי הופיע חסד אלהים להושיע את כל בני האדם׃

¹² וליסר אתנו אשר נתעב הרשע ותאות העולם ונחיה בעולם הזה בצניעות ובצדק ובחסידות׃

¹³ ונחכה לתקוה המאשרת ולהופעת כבוד אלהינו הגדול ומושיענו ישוע המשיח׃

¹⁴ אשר נתן את נפשו בעדנו לגאלנו מכל עול ולטהר לו עם סגלה הזריז במעשים טובים׃

¹⁵ את אלה תדבר ותזהיר ותוכיח בכל חזקה ואיש אל יבוז לך׃