¹ Nun rilate al la monkolekto pro la sanktuloj, kiel mi ordonis al la eklezioj de Galatujo, tiel ankaŭ vi faru.

² La unuan tagon de la semajno, ĉiu el vi provizu ĉe si laŭ tio, kion li prospere akiris, por ke ne estu kolektoj tiam, kiam mi venos.

³ Kaj kiam mi alvenos, kiujn vi per leteroj aprobos, tiujn mi sendos, por alporti vian donacon al Jerusalem;

⁴ kaj se konvenos, ke mi ankaŭ tien vojaĝu, ili vojaĝos kun mi.

⁵ Sed mi venos al vi, kiam mi estos trapasinta Makedonujon; ĉar Makedonujon mi ja trapasos;

⁶ sed ĉe vi eble mi restos, aŭ eĉ travintros, por ke vi antaŭen irigu min, kien mi veturos.

⁷ Ĉar mi ne volas vidi vin nun dumvojaĝe; ĉar mi esperas resti kelkan tempon ĉe vi, se la Sinjoro permesos.

⁸ Sed mi restos en Efeso ĝis Pentekosto;

⁹ ĉar pordo granda kaj efika malfermiĝis al mi, kaj estas multaj kontraŭstarantoj.

¹⁰ Se Timoteo venos, zorgu, ke li estu ĉe vi sentime; ĉar li faras la laboron de la Sinjoro, kiel mi ankaŭ;

¹¹ neniu do lin malestimu. Sed antaŭen irigu lin en paco, por ke li venu al mi; ĉar mi atendas lin kun la fratoj.

¹² Sed rilate al la frato Apolos, mi multe petegis lin veni al vi kun la fratoj; sed tute mankis volo veni nun; sed li venos, kiam li havos oportunan tempon.

¹³ Viglu, staru firme en la fido, viriĝu, fortiĝu.

¹⁴ Ĉio via estu farata en amo.

¹⁵ Mi petegas vin, fratoj (vi konas la domon de Stefanas, ke ĝi estas la unuaaĵo de la Aĥaja lando, kaj ke ili sin dediĉis al la servo de la sanktuloj),

¹⁶ ke vi ankaŭ submetiĝu al tiaj, kaj al ĉiu kunhelpanto kaj kunlaboranto.

¹⁷ Kaj mi ĝojas pro la alveno de Stefanas kaj Fortunato kaj Aĥaiko, tial, ke vian mankaĵon ili plenigis.

¹⁸ Ĉar ili refreŝigis mian spiriton kaj vian; rekonu do tiajn.

¹⁹ La eklezioj de Azio vin salutas. Akvila kaj Priskila vin salutas multe en la Sinjoro, kune kun la eklezio en ilia domo.

²⁰ Ĉiuj fratoj vin salutas. Salutu unu la alian per sankta kiso.

²¹ La saluto de mi, Paŭlo, per mia propra mano.

²² Se iu ne amas la Sinjoron Jesuo Kristo, li estu anatemita. Maran-ata.

²³ La graco de la Sinjoro Jesuo Kristo estu kun vi.

²⁴ Mia amo estu kun vi ĉiuj en Kristo Jesuo. Amen.