¹ Vågar nokon av dykk, når han hev sak mot ein annan, å søkja dom hjå dei urettferdige og ikkje hjå dei heilage?

² Eller veit de ikkje, at dei heilage skal døma verdi? Og dersom verdi vert dømd av dykk, er de då uverdige til å døma i dei minste saker?

³ Veit de ikkje, at me skal døma englar, og då vel mykje meir i timelege ting?

⁴ Når de då hev saker um timelege ting, so set de deim til domarar som er vanvyrde i kyrkjelyden!

⁵ Til skam for dykk segjer eg dette. So finst der då ingen vis mann hjå dykk, ikkje ein einaste som kann skilja trætta for bror sin?

⁶ Men bror fører sak mot bror, og det endå for vantruande domarar.

⁷ Det er no i det heile eit tap for dykk at de hev sak med kvarandre. Kvi lid de ikkje heller urett? Kvi toler de ikkje heller uskil?

⁸ Men de gjer urett og uskil, og det endå mot brør!

⁹ Eller veit de ikkje, at dei urettferdige ikkje skal erva Guds rike? Lat dykk ikkje dåra! Korkje lauslevande eller avgudsdyrkarar eller horkarar eller blautfengne eller slike som syndar mot naturi,

¹⁰ eller tjuvar eller giruge eller drikkarar eller baktalarar eller røvarar skal erva Guds rike.

¹¹ Og slike var sume av dykk; men de er avtvegne, men de er helga, de er rettferdiggjorde ved Herren Jesu namn og i vår Guds Ande.

¹² Alt hev eg lov til, men ikkje alt gagnar; alt hev eg lov til, men eg skal ikkje lata noko få vald yver meg.

¹³ Maten er for magen, og magen for maten; og Gud skal gjera ende både på den eine og den andre. Men likamen er ikkje for hor, men for Herren, og Herren for likamen.

¹⁴ Og Gud vekte upp Herren og skal og vekkja oss upp ved si kraft.

¹⁵ Veit de ikkje, at dykkar likamar er Kristi lemer? Skal eg då taka Kristi lemer og gjera deim til lemer åt ei skjøkja? Langt ifrå!

¹⁶ Eller veit de ikkje, at den som held seg til skjøkja, er ein likam med henne? For det er sagt: «Dei tvo skal vera eitt kjøt.»

¹⁷ Men den som held seg til Herren, er ein ande med honom.

¹⁸ Fly hor! All synd som eit menneskje kann gjera, er utanfor likamen; men den som gjer hor, syndar imot sin eigen likam.

¹⁹ Eller veit de ikkje, at likamen dykkar er eit tempel for den Heilage Ande som bur i dykk, han som de hev frå Gud, og at de ikkje er dykkar eigne?

²⁰ For de er dyrt kjøpte. Æra då Gud i dykkar likam!