¹ PWE samero lapalap karos, me pilipildar sang ren aramas akan, pan kasapwilada, pwen sauasa aramas akan ren Kot, pwen wiada kisakis o mairong pweki dip;

² Me kak pamada duen me sapung o salongala kan, pwe i pil me lued.

³ I me a udan kida mairong pein dip a, dueta a kin tomeki dip en aramas akan.

⁴ O sota amen, me kin kasapwilada pein i, pwe a pan kasapwilada sang ren Kot dueta Aron.

⁵ Pil dueta Kristus, me sota kalinganada pein i, pwen wiala samero lapalap, a i me wiadar me masani ong i: Koe nai Ol, ran wet I kaipwi uk adar.

⁶ Duen a pil kotin masani ekis wasa: Koe samero duen al en Melkisedek kokolata.

⁷ O ni ran akan, me a kotikot ni pali uduk, a kotin mairongki laolao, o ngidingid, o kaukauwet, o tontonir ong i, me pan kak dorela i sang a pan matala, o pweki a wauneki Kot, a laolao pil pwaidar.

⁸ I me Sapwilim a, ari so, a kotin padakki peik ni a kalokolok.

⁹ O ni a unsokalar a kotin wialar kamaur pan maur soutuk ong irail karos, me kin oke i.

¹⁰ O Kot pil kotin kamare kin i samero lapalap duen al en Melkisedek.

¹¹ Iran mepukat kasoi toto mi re at, a me apwal en kaweweda, aki omail sota dedeki.

¹² Nan a daulier ansau, me komail en wiala saunpadak, ari so, komail me pil mau ong, amen en kawewe ong komail tapin lamalam en masan en Kot, wialar song dueta irail, me kin tungole pil en didi, a kaidin kisin manga.

¹³ Pwe amen amen me kin tungole pil en didi, me man salongpon ni masan en pung, pwe a rasong seri pwelel.

¹⁴ A me unsokalar akan me mau ong kisin manga, pwe irail me anlar lamalam pweki ar laudelar, ap asa duen me mau o me sued.