¹ I me kitail pan muei sang tapin padak en Kristus, ap kakairida o unsokela, a kaidin pur ong wia pason ni at kalukila wiawia en mela kan, de poson Kot,

² De padak duen paptais, o pokada pa kan poa, o duen en me melar akan ar pan maureda, o duen kadeik soutuk.

³ A i me kitail pan wiada, ma Kot pan kotin mueid ong.

⁴ Pwe a so kak pa ’rail, me marainlar, o me wewekier kisakis sang lang, o audaudkier Ngen saraui,

⁵ O lolekong kilar masan en Kot mau, o manaman en muei mau kokodo,

⁶ Ma irail pan pup wei sang, re solar pan kak pur ong kalula, pwe irail pein kalopuela Sapwilim en Kot o kanamenokalar i.

⁷ Pwe sap me lamelamur ki katau, me kin purepure moredi ong, o me kawosadang irail, me kin wia sapasap kapwa mau, iei sap o me kin ale pai ren Kot.

⁸ A ma a kin kawosada tuka teketek o dip, iei me sued o mau ong kariala o ni imwi a pan karongala.

⁹ A kompoke pat akan, se asa, me komail sota kin duota ni meakan me kareda maur, ari so, iduen at kin padapadak.

¹⁰ Pwe Kot sota sapung, o a sota kak maliela omail wiawia kan o omail dodok limpok, me komail kasansale ong mar a ni omail papaer me saraui kan, o ni omail kin papa.

¹¹ A kit kin inong iong, amen amen komail en nantiong duedueta kasansaleda kaporo por melel lao lel imwi.

¹² Pwe komail der tangangala, a komail alale sang irail, me poson o kanongama ap sosoki inau kan.

¹³ Pwe ni en Kot a kotin inauki ong Apraam, a kotin kaukila pein i, pwe sota me lap sang en kau kila,

¹⁴ Masani: Melel I pan kapai uk ala o kangeder uk ala.

¹⁵ I ari auiauieta ni kanongama ap pwaida inau o.

¹⁶ Pwe aramas akan kin kaukila me lapa sang ir, o kaula kin kaimwisokala akamai karos.

¹⁷ I me Kot pil kotin kaukila, pwen kasale ong irail, me pan sosoki pai en a inau o, me a inau sota kak wukila.

¹⁸ Pwe song riau me so kak wuk, pwe Kot sota kak likam, en kamait kit ala melel, pwe kitail en tang wong kaporopor, me mi mo atail.

¹⁹ Kaporopor wet me rasong paipong en ngen atail, me melel o teng, me kak lel wong nan pera saraui.

²⁰ Iei wasa atail saunkair kotila ia pweki kitail, Iesus, me wiala samero lapalap ni al en Melkisedek kokolata.