¹ Lat broderkjærleiken vara ved!

² Gløym ikkje gjestmilda! for ved den hev nokre havt englar til gjester, utan dei visste det.

³ Kom i hug deim som er fangar, som var de deira medfangar, deim som lid vondt, sidan de og sjølve er i likamen!

⁴ Egteskapet vere i agt og æra hjå alle, og egtesengi usmitta! for lauslivande og horkarar skal Gud døma.

⁵ Lat dykkar ferd vera utan pengehug, og ver nøgde med det de hev! for han hev sagt: «Eg skal so visst ikkje sleppa deg og ikkje slå handi av deg,»

⁶ so me hugheilt kann segja: «Herren er min hjelpar, eg vil ikkje ottast; kva kann eit menneskje gjera meg?»

⁷ Kom i hug dykkar forstandarar som hev tala Guds ord til dykk! sjå utgangen på deira ferd, og fylg so etter deira tru!

⁸ Jesus Kristus er i går og i dag den same, ja til æveleg tid.

⁹ Lat dykk ikkje føra vilt av mangfaldige og framande lærdomar! for det er godt at hjarta vert styrkt ved nåden, ikkje ved mat, som ikkje hev gagna deim som for dermed.

¹⁰ Me hev eit altar som dei ikkje hev lov til å eta av, som tener ved tjeldet.

¹¹ For dei dyr som blodet vert teke av og bore til soning for synd inn i heilagdomen ved øvstepresten, deira kroppar vert uppbrende utanfor lægret.

¹² Difor leid og Jesus utanfor porten, so han ved sitt eige blod kunde helga folket.

¹³ Lat oss då ganga ut til honom utanfor lægret, so me ber hans vanæra!

¹⁴ For me hev ikkje her ein varande by, men søkjer den komande.

¹⁵ Lat oss då ved honom alltid bera fram til Gud lovoffer, det er: frukt av lippor som lovar hans namn!

¹⁶ Men gløym ikkje å gjera godt og gjeva andre med dykk! for slike offer hev Gud hugnad i.

¹⁷ Fylg dykkar forstandarar og lyd deim! for dei vaker yver sjælerne dykkar som dei som skal gjera rekneskap, so dei kann gjera det med gleda og ikkje sukkande, for det er dykk ikkje til gagn.

¹⁸ Bed for oss! for me trur at me hev eit godt samvit, og me vil gjerne fara rett åt i alle måtar.

¹⁹ Og eg bed dykk so mykje meir um å gjera dette, so eg snarare kann verta gjeven dykk att.

²⁰ Men fredsens Gud, han som i kraft av æveleg pakts blod førde den store hyrding for sauerne, vår Herre Jesus, upp frå dei daude,

²¹ han gjere dykk full-dugande i all god gjerning, so de gjer hans vilje, med di han verkar i dykk det som er til hugnad for honom, ved Jesus Kristus! Honom vere æra i all æva! Amen.

²² Eg bed dykk, brør, tak dette påminningsordet vel upp, for eg hev skrive stutt til dykk.

²³ Vit, at bror vår Timoteus er gjeven fri; saman med honom vil eg sjå dykk, um han kjem snart.

²⁴ Helsa alle dykkar forstandarar og alle dei heilage! Dei frå Italia helsar dykk.

²⁵ Nåden vere med dykk alle!