¹ ARI, ri ai kan, se pil poeki re omail o panaui kin komail Kaun Iesus, duen me komail aleer sang kit, o duen me komail en kekeideki wei, o kaperenda Kot, iduen omail kakairida.

² Pwe komail asa duen kusoned akan, me se pang ong komail ren Kaun Iesus.

³ Pwe iet kupur en Kot, omail sarauila, pwe komail en liki sang nenek.

⁴ Amen amen en kanai ong pein war a, pwen saraui o wau o liki sang inong sued,

⁵ Kaidin ni dender ong inong sued duen men liki kan, me so asa Kot;

⁶ O sota me pan piti de kasapungi ong ri a ni meakot, pwe Kaun o pan kotin iki ong i, duen me kit inda o kadede ong komail er mas o.

⁷ Pwe Kot sota molipei kitail ong samin, a pwen saraui.

⁸ A ma amen komail pan mamaleki mepukat, kaidin aramas me a pan mamaleki pwe Kot, me pil kotiki ong komail er sapwilim a Ngen saraui.

⁹ A duen limpok en saulang, menda i en intingki wong komail, pwe pein komail padakki sang ren Kot, me komail en poke pena.

¹⁰ Nan met komail kin wiai ong saulang karos, me mimi Masetonien pon. A se panaui kin komail ri at akan, komail en kakairida.

¹¹ O komail nenenla o inong iong apwali pein omail dodok, kadokeki pein pa omail, duen me se padaki ong komail er,

¹² Pwe komail en sansal mau mon me mi liki kan, o komail der mau ong amen en apwali komail.

¹³ Ri ai kan, se sota men oki sang komail duen me mairelar akan, pwe komail der insensued dueta irail, me sota ar kaporopor.

¹⁴ Pwe ma kitail kamelele, me Iesus matala ap iasadar, nan iduen me mairelar ren Iesus, Kot pil pan kalua ir ala re a.

¹⁵ Pwe ieteten me se indang komail ni masan en Kaun o, kit me memaureta lao Kaun o pan kotin pwarado, sota pan ko wei mon me mair akan.

¹⁶ Pwe pein Kaun o pan kotido sang nanlang ki masan laud, o kapiti en toulang lapalap amen, o koronete en Kot; me melar akan ren Kristus ap pan maureda mas.

¹⁷ Kit me memaureta luadi ap pan iang ir peukadala nan dapok kan, ko ong ren Kaun o nan wäwä, kitail ap pan mimieta ren Kaun o kokolata.

¹⁸ Komail ari kamaiteki komail la padak pot et.