¹ PAULUS wanporon en Kristus Iesus amen pan kupur en Kot o ri atail Timoteus,

² Ong ri at saraui o lelapok ren Krisus akan, me mi Kolose; mak o popol sang ren Kot Sam atail o Kaun Iesus Kristus!

³ Kit kin danke Kot o Sam en atail Kaun Iesus Kristus o kapakapa kin komail kaukaule.

⁴ Kit lao rongadar duen omail poson Kristus Iesus, o omail limpok ong saraui kan karos,

⁵ Pweki kaporopor eu, me nekineki ong komail nanlang, duen me komail rongadar mas o ni padak melel en rongamau,

⁶ Me lel wong komail o pil sap akan karos, o a kin wada o kakairida dueta re omail sang ni ran o, me komail rongadar o dedekier melel mak en Kot;

⁷ Duen omail padakki sang ren Epapras at warok kompok amen, me papa lelapok en Kristus ong komail amen,

⁸ Me pil kaireki dong kit duen omail limpok pena ni Ngen.

⁹ I me se sota kin dukedi sang at kapakapa kin komail o poekipoeki sang ni ran en at rongadar, pwe komail en direki erpit en kupur a, o komail en lolekong o koiok ngenin,

¹⁰ O kekeid wei duen me kon ong Kaun o, o kapareda wan wiawia mau karos, o kakairida ki asa Kot,

¹¹ O keleki kel karos duen manaman en a lingan pwen dadaurata o kanongama ki peren,

¹² Danke Sam o, me kotin kamau kitail lar, en iang pwaisaneki soso en me saraui kan nan marain.

¹³ Me kotin kapiti sang kitail manaman en rotorot, ap kotin kasau kitail dong nan wein Na kompokepa,

¹⁴ Me kotin dore kitail la iei lapwan dip atail,

¹⁵ I me kasale pan Kot, me so sansal, me meseni en audepa karos.

¹⁶ Pwe karos wiauiki i, karos me mi nanlang o sappa, me sansal o me so sansal, ma me poe kan, de saumas akan, de wei kan, de manaman akan, meakaros wiauiki i o ong i.

¹⁷ O i me kotikot mon meakaros o meakaros memaureki i.

¹⁸ O i tapwin war a, iei momodisou, o i me tapi o meseni en me iasadar sang ren me melar akan, pwe i en mon meakaros.

¹⁹ Pwe Kot kotin kileledier me mau kan karos en mi re a.

²⁰ I ari kalolamau penang pein i meakan karos, ma ni sappa de nanlang, ni a kotin wiada muei mau ki ntan a lopu.

²¹ O komail, me doo wei sang o imwintiti mas o ni omail lamelame o wiawia sued akan,

²² A kotin kalolamau komail lar ki war a uduk ni a matala, pwen kapware kin komail da saraui o pung o so kadeik pa omail mo a.

²³ Ma komail dadaurata poson o tengeteng o so mokid wei sang ni kaporopor ki rongamau, me komail rongadar, o me lolok ong audepa karos me mi pan lang, me ngai Paulus wialar papa men.

²⁴ I ap perenki ai kalokolok ki komail o men kaimwisok kila uduk ai me luedi ni kamekam en Kristus, pweki war a, iei momodisou,

²⁵ Me i wialar papa men duen koa dodok en Kot, me i aleer pweki komail pwen usela masan en Kot.

²⁶ Iei me rir kot, me rir sang nin tapin kaua o men kaua, a met a kadiarok ong sapwilim a saraui kan,

²⁷ Me Kot men kasansaleda kapwapwa en lingan en rir wet ong men liki kan, iei Kristus me kotikot lol omail, i kaporopor en lingan.

²⁸ I me kit kin padaki o panepanaui aramas karos, o padapadaki aramas karos ni lolekong karos, pwe kit en kapwareda aramas karos ni unsoki ong Kristus.

²⁹ I me i pil dodok kelail, duen wiawia en i me kin dodok kelail lol i.