¹ ARI, ma komail iang Kristus iasadar, en rapaki me pali poa kan, wasa Kristus kotikot ia ni pali maun en Kot.

² Inong iong me mi pali poa a kaidin me mi nin sappa.

³ Pwe komail melar, o maur omail rirlong Kristus ren Kot.

⁴ Kristus, iei maur atail, lao pwarado, kitail pan pil iang i pwarado ni lingan o.

⁵ Komail ari kamela kokon omail, me mi sappa: Nenek, samin, tiak sued, inong sued, norok kapwa, pwe iei kaudok sued.

⁶ Pweki mepukan ongiong en Kot kin lel ong seri sopeik kan.

⁷ Me komail pil kekeideki mas o, ansaun omail akmemaurki.

⁸ A metet komail pwilikidier meakaros: Makar, lingarangar, katantat, lalaue, kasoi kasaut nan au omail;

⁹ Ender likam nan pung omail, pwe komail pwilikidier aramas maring iangaki a wiawia kan,

¹⁰ Ap aleer me kap, me wilikapadang lolekong duen mom en me kausedar i.

¹¹ Wasan sota men Krik, sota Sus, sota sirkomsais, pil sota sosirkomsais, sota men liki, sota Site, sota ladu o sota me maioda men, a Kristus eta me kotikot ni karos.

¹² Pwil po omail duen en Kot a pilidar akan, me saraui o kompok, limpok en nan mongiong, o kadek, o karakarak, o opampap, o kanongama,

¹³ Apwali amen amen, o mak pena, ma amen kainsensuedi amen, duen Kristus kotin mak ong komail er, iduen komail.

¹⁴ O moneki limpok, me ora pena kamau pokon.

¹⁵ O popol en Kristus en kaunda nan mongiong omail, me komail pil paeker pena ni war ta ieu, o komail danke.

¹⁶ Komail nantiong dodokiki masan en Kristus nan pung omail ni lolekong karos; padapadaki o panapanaui komail pena, ki psalm, o kaul en kaping, o kaul ngenin, o kakaul ong Kot nan mongiong omail ki mak.

¹⁷ O karos, me komail kin wia ni lokaia, o wiawia kan, en wiada ni mar en Kaun Iesus, o danke Kot o Sam pweki i.

¹⁸ Komail li akan udi ong omail warok kan ni Kaun o, duen me kon ong.

¹⁹ Komail ol akan, pok ong omail warok kan o der makar pa ’rail.

²⁰ Komail seri kan, peiki ong me wia komail da ni meakaros, pwe i me kon ong Kaun o.

²¹ Komail sam akan, der kamakar mal noumail seri kan, pwe ren der sang komail la.

²² Komail ladu kan, peiki ong omail saumas ni uduk ni meakaros kaidin ni dodok mon aramas, pwen konekon ren aramas, a ni impimpai en mongiong o, o lan Kaun o.

²³ O karos, me komail wiada en lolm ong wiada, dueta ong Kaun o a kaidin ong aramas akan.

²⁴ Ap asa, me komail pan ale kating en soso ren Kaun o, pwe komail kin papa Kaun Kristus.

²⁵ A me wia sapung, pan pein pukoki sapung me a wiadar pwe Kot sota kin lipilipil aramas amen.