¹ PAULUS o Timoteus ladun Iesus Kristus ong me saraui kan karos en Kristus Iesus o pisop o saunkoa kan nan Pilipi.

² Mak o popol sang ren Kot Sam atail o Kaun Iesus Kristus en mi re omail!

³ I kin danke ai Kot ni ai tamatamanda komail.

⁴ I me i kin wiada ni ai kapakap kin komail ansau karos, o i kin kapakap ni pereperen.

⁵ Pweki omail dadaurata rongamau sang ni tapi o kokodo lel met.

⁶ O i kamelele me i, me tapiadar wiawia mau eu re omail, pil pan kanikiela lao lel ran en Iesus Kristus.

⁷ Me pung i en kamelele mepukat duen komail karos, pwe i kin kolekol komail nan mongiong i ni ai salidi wet, wasa i kin kaweweda o kadededa rongamau; a komail karos kin iang ia kapwaiada mak wet.

⁸ Pwe Kot ai saunkadede, duen i kin loleiteki komail pan kupur en Kristus Iesus.

⁹ O me i pil kapakapaki pwe omail limpok en lapalapala kakairida ni lolekong o lamalam akan.

¹⁰ Pwe komail en kasauiada, da me mau sang karos, pwe komail en melel o pung lao lel ran en Kristus.

¹¹ O direki wan pung kan, me kin wiaui ren Iesus Kristus men kalinganada o kapinga Kot.

¹² Ri ai kan, i men, komail en asa ir ai, me dialan kaindindar rongamau,

¹³ Nan i ai salidi kan pweki Kristus, me pwarapwaradar nan im en monsap o wasa karos.

¹⁴ O ri atail toto pan kupur en Kaun, me aingar kidar ai salidi kan, ap aima sang mas o, en padaki masan en Kot ap so masak.

¹⁵ A akai kin padaki duen Kristus akpeirin, o akamai, o akai sang nan ar inong mau.

¹⁶ A met akan ni limpok, pwe re asa, me ngai salidier, pwen kadede pan rongamau.

¹⁷ Irail kin padaki duen Kristus kapei lokaia o so melel, re kiki ong, me re pan kalaudela ai salidi kan;

¹⁸ A pil menda? Pwe Kristus kin lolok sili ni song karos, ma ni akamai de ni melel, i me i peren kida, ei i pan pereperen.

¹⁹ Pwe i asa, mepukat pan kare ong ia maur soutuk ki omail kapakap o sauas pan Ngen en Iesus Kristus.

²⁰ Duen ai inong iong, o auiaui, o kaporoporeki, me i sota pan namenokala ni eu song. A duen mas o, iduen ansau wet Kristus en kapingan laud ni war ai, ma ni ai pan memaurata de mela.

²¹ Pwe Kristus, i maur i, o mela ai pai.

²² A ma i pan memaurata ni pali uduk, ai wiawia kan pan kadepa; ari i ap sasa, da me i en pilada.

²³ Pwe i mauki ira karos: I inong iong mela, pwen mila ren Kristus, pwe i eta me mau.

²⁴ A ai mimieta ni pali uduk me mau song pweki komail.

²⁵ Ari, i ap asa, me i pan mimieta re omail karos, pwen sauasa omail peren o poson,

²⁶ Pwe omail kaping en lapalapala ren Kristus Iesus ki ai pwaralang komail.

²⁷ Ari, komail weweid duen me warong rongamau en Kristus, pwe ma i pwaralang komail, de ni ai doo, i en rong, me komail keleki ngen ta ieu, o komail lamalam ta pot, i iang kelail dodok ong rongamau ki poson.

²⁸ O komail ender waponki, me kin palian komail akan, pwe i kasansale pan arail pan lokidokila, a omail pan maurela; a mepukat sang ren Kot.

²⁹ Pwe a muei ong komail er pan kupur en Kristus, kaidin poson eta, pwen pil kalokolokeki i,

³⁰ Pwe komail kin wia pei ota, me komail kilanger re i, o me komail kin rong duen ngai.