¹ MA panapanau eu ren Kristus mia, ma kamait en limpok, ma sau pena en Ngen, ma limpok melel, o kadek sang nan ngen omail,

² Komail ap kaunsokela ai peren ni omail lamalam ta pot, o limpok ta ieu, o min ta ieu, o inong iong song ta ieu,

³ O der aklemai o der wia meakot ni aklapalap a ni karakarak, amen en kakaki amen mo a.

⁴ Amen amen ender apwali pein a dipisou kan, a amen amen en apwali en akai ar dipisou.

⁵ Pwe i tiak en mi re omail, me pil mi ren Iesus Kristus.

⁶ Me mom en Kot, ap sota men ale ong pein i en dueta Kot.

⁷ Ap akamaleki pein i o wiala ladu men o song en aramas akan.

⁸ O kotin sansaleda ni mom en aramas, o kasapwilidi pein i, o ni a kotin peiki ong lel mela, ei lel mela ni lopu.

⁹ Nan i me Kot kotin kasapwilada i wasa ileile, o kotiki ong i mar eu, sikida sang mar karos.

¹⁰ Pwe karos en kelepukidi ni mar en Iesus, me mi nanlang o nin sappa o pan sappa.

¹¹ O lo karos en kadedeki, me Iesus Kristus me Kaun pwen kalinganada Kot Sam.

¹² Ari kompoke pai kan, duen omail okoke kokodo, kaidin ni omail wokaren ia do, a me sikidar ansau wet ni ai doo, en pere ki, o lomwiniki kadokedoke kamaur pamail.

¹³ Pwe Kot me kotin wiada karos nan lol omail: Inong o kapwaiada duen kupur a.

¹⁴ Komail wiada meakaros so, lipanede o so peikasal.

¹⁵ Pwe komail en pung o melel o seri en Kot akan, me so lol riapot nan pung en di sued o sapung, me komail ser sansal nan pung arail, dueta ser en sappa kan.

¹⁶ Kasansaleda masan en maur, pwen kaping pa i ni ran en Kristus, pwe i ender tang mal de dodok mal.

¹⁷ A ma i dueta mairong urak eu wudoki ong mairong o dodok en omail poson, i kin peren kida, o i pan iang komail karos pereperen.

¹⁸ I me komail en pil perenki o komail en iang ia pereperen.

¹⁹ A i kaporoporeki Kaun Iesus, me i pan madang kadar wong komail Timoteus, pwe i en pil insenemau, i lao asa ir omail.

²⁰ Pwe sota amen mi re i, me dueta i, me kin apwali komail melel.

²¹ Pwe karos kin rapaki me pein ar, a kaidin me sapwilim en Kristus.

²² A komail asa, me a tiak me pung, pwe a sauasa ia ni rongamau dueta seri men ong a papa.

²³ I me i kaporoporeki, me i pan kadarala eden, i lao asa ir ai.

²⁴ A i liki Kaun o, me pein ngai pil pan pwara wei madang.

²⁵ A i lamedar, me mau en kadarlang komail ri ai Epaprotitus me ai warok ni ai dodok o ai peipei, iei omail men en kadar, o me papa ia ni ai samama.

²⁶ Pwe komail asa, a ngong kin komail melel, o a patauki melel omail rongadar, me a somau.

²⁷ Melel, a somau meid laud, koren iong mela. A Kot me kotin kupuredar i; a kaidin i eta, pwe pil ngai, pwe i de paiola pokon.

²⁸ A i madang kadarala i, pwe komail en kilang i, ap peren kida, o ai insensued en pil tikitikela.

²⁹ Komail ari kasamo i ni Kaun o popol, o wauneki me dueta i kan.

³⁰ Pweki wiawia en Kristus a koren iong mela, ni a sota kasampwaleki pein maur i, pwen sauasa ia wiliandi komail.