¹ PAR eisoklimau murin nanmarki Tiperius a sapwileda ni muein Pontius Pilatus kopina en Iudäa, o Erodes nanmarki en Kaliläa, o ri a ol Pilipus nanmarki en Ituräa o Trakonitis, o Lisanias nanmarki en Apilene,

² Ni muein Anas o Kaipas samero lapalap, masan en Kot ap pwara dong Ioanes nain Sakarias nan sap tan.

³ I ari kotikot sili nan sap karos ni kail en Iordan, padapadak duen paptais en kalula ong lapwada dip akan,

⁴ Duen a intingidier nan puk en masan akan en saukop Iesaia, me masani: Ngil eu likelikwir sili nan sap tan: Komail kaonopada al en Kaun o, kaineneda al a!

⁵ Wau karos pan audaud o nana o dol karos pan patapatedi, o me pirok, pan inenla, o me ululen, pan patapatela.

⁶ Uduk karos pan udial kamaur en Kot.

⁷ A ap masani ong aramas akan, me koieila, pwen paptaisla re a: Dakot, wan oter komail; is me padaki ong komail, en piti sang ni kamekam, me kokodo?

⁸ Ari komail kapareda wan kalula mau. A komail depa lamelame, me komail pan indang pein komail: Nan Apraam sam atail. Pwe i indai ong komail, me Kot kotin kak ong wiaki ong Apraam na seri kai takai pukat.

⁹ Sile o mier ni tapin tuka kan. Ari, tuka karos, me so wa mau, pan palepaledi o lokidokila nan iai.

¹⁰ Pokon o ap idok re a indada: A da me kit en wia?

¹¹ A kotin sapeng masani ong irail: Meamen, me a sakit riau, i en ki ong, me sota a. O me kan a kisin manga mia, i en wia dueta.

¹² A saunopwei kan pil pwara dong i pwen paptais, irail potoan ong i: Saunpadak, a da me kit en wia?

¹³ A masani ong irail: Komail der ale laude sang me kileledier.

¹⁴ Saunpei kan ap pil kalelapok re a indada: A da me kit en wia? A masani ong irail: Komail der kaloke mal meamen, o der wia sapung ong meamen, a komail ale pwain omail o insenemau kila.

¹⁵ Aramas akan lao kiki ong o mongemongeloleki, me Ioanes me Kristus,

¹⁶ Ioanes ap sapeng masani ong irail karos: I paptais kin komail pil, a me laude sang ia kotido muri, me i sowar ong, en lapwada sal en sapwilim a sut, i me pan paptais kin komail Ngen saraui o kisiniai.

¹⁷ Tanir mi nan lim a, a pan kotin koko melel sapwilim a pera, ap nekid pena wan korn nan sapwilim a im en nak, a dip a pan kotin karong kila kisiniai sokun.

¹⁸ O song toto, me a kotin panaui aramas akan o padaki ong pokon o rongamau.

¹⁹ A nanmarki Erodes, me Ioanes kapung pweki Erodias en ri a ol a paud, o pweki sued karos, me Erodes wiadar,

²⁰ Kalaudela dip a ni a saliedi Ioanes nan imateng.

²¹ A kadekadeo aramas karos lao paptaiselar, o Iesus pil paptaiselar o kotin laolaoki, nanlang ap ritida,

²² O Ngen saraui kotidi dong i ni mom en muroi men, o ngil eu sang nanlang masani: Koe nai Ol kompok, me I kin peren kida.

²³ Iesus impan saunpar sileisok ni a kotin tapiada saunpadak, o re kikiong me i nain Iosep, me nain Eli,

²⁴ Me nain Matat, me nain Lewi, me nain Melki, me nain Ianes, me nain Iosep,

²⁵ Me nain Matatia, me nain Amos, me nain Naum, me nain Esli, me nain Nakai,

²⁶ Me nain Maat, me nain Matatia, me nain Simei, me nain Iosep, me nain Iuda,

²⁷ Me nain Ioanan, me nain Resa, me nain Serupapel, me nain Salatiel, me nain Neri,

²⁸ Me nain Melki, me nain Adi, me nain Kosam, me nain Elmodam, me nain Er,

²⁹ Me nain Ioses, me nain Elieser, me nain Iorim, me nain Matat, me nain Lewi,

³⁰ Me nain Simeon, me nain Iuda, me nain Sosep, me nain Ionam, me nain Eliakim,

³¹ Me nain Melia, me nain Mena, me nain Matatan, me nain Natan. Me nain Dawid,

³² Me nain Iese, me nain Oped, me nain Poas, me nain Sala, me nain Naasan,

³³ Me nain Aminadap, me nain Aram, me nain Esron, me nain Peres, me nain Iuda,

³⁴ Me nain Iakop, me nain Isaak, me nain Apraam, me nain Tara, me nain Naor,

³⁵ Me nain Seruk, me nain Reku, me nain Palek, me nain Eper, me nain Sala,

³⁶ Me nain Kainan, me nain Arpaksad, me nain Sem, me nain Noa, me nain Lamek,

³⁷ Me nain Metusala, me nain Enok, me nain Iared, me nain Maalaleel, me nain Kainan,

³⁸ Me nain Enos, me nain Set, me nain Adam, me sapwilim en Kot.