¹ I ARI kotilong ong nan kanim Ieriko, ap kotin daulula.

² A kilang, ol kapwapwa men mia, ad a Sakäus, me saumas en saunopwei kan.

³ A men kilang Iesus, pwen asa, is i, ap sota kak, pweki pokon o, o a sakakair.

⁴ I ari tiong mo ’rail, dauda nin tuka pot, pwen kak kilang i, pwe a pan kotin daulul wasa o.

⁵ A lao lel wasa o Iesus ap kotin masanda diar i, masani ong i: Sakäus, madang daudi, pwe I pan pedelong ong nan im om ran wet.

⁶ I ari madang daudi kasamo i pereperen.

⁷ Irail lao kilanger met, karos ap lipanedeki inda: A pedelonger, pwen kairu ren ol dipan amen.

⁸ A Sakäus potodo potoan ong Kaun o: Maing re kotin mangi, apali en ai kapwa i pan kisakisaki me samama kan, o ma i kotaue amen, i kin kasapal wong i pan pa pak laude sang.

⁹ Iesus kotin masani ong i: Maur me pwara dong nan im wet ran wet, pwe a pil nain Apraam amen.

¹⁰ Pwe Nain aramas pwara don rapaki o kamaureda me salongalar.

¹¹ A ni ar rongadar mepukat, a pil kotin masani karaseras eu, aki koren iong Ierusalem, o re kiki ong, me wein Kot pan madang sansaleda.

¹² A kotin masani: Ol lapalap amen kolang sap doo eu, pwen nine mar a, ap pan puredo.

¹³ I me eker pena na ladu ek, o ki ong irail paun eisok, indang irail: Komail dodokki, i lao puredo.

¹⁴ A na aramas akan kailongki i, kadarala mur i kaireki lang i: Se sota mauki, ol men et en kaun kit.

¹⁵ Kadekadeo a lao puredo, murin a aleer wei o, ap ilakelang ladu kan, me a ki ong na moni, pwen asa duen en amen amen ar kalaudelar na moni.

¹⁶ Men mas ap pwarado indada: Maing, omui paun kareda paun eisok.

¹⁷ A indang i: Meid pai ladu mau koe, aki om apapwali mau me tikitik, koe pan id kaunda kanim eisok.

¹⁸ O kariamen ap pwarado indada: Maing, omui paun me kareda paun limau.

¹⁹ A pil indang i: Koe pan kaunda kanim limau.

²⁰ O pil amen pwarado indada: Maing, mangi, ietet sapwilim omui paun, me i nekidala nan lim en pudo.

²¹ Pwe i masak komui, pwe ol petik amen komui. Komui kin aleda, me kaidin komui kidier, o dolung sang, me kaidin komui padukedier.

²² A indang i: Sang nan au om i pan kadeik kin uk ada ladu sued koe. Koe asaer, me ol petik amen ngai, me kin ale, me kaidin ngai kidier o dolung sang, me kaidin ngai padukidier.

²³ Menda koe sota wala nai moni wasan kanaitik, o i lao puredo, i pan ale me udan ai iangaki moni naitik.

²⁴ A indai ong irail me u impa: Ale sang i paun o, ki ong ren me a paun eisok!

²⁵ Irail indai ong i: Maing, nan a nainekier paun eisok.

²⁶ Pwe I indai ong komail, meamen, me a mia, ekis pan ko ong, a me sota a mia, nan a pwitikatik pil pan katia sang.

²⁷ A ir, ai imwintiti, me kang, i en kakaun ir, wa ir do, o kame ir ala mo i!

²⁸ A lao kotin kaimwisokala a masan pukat, ap kotiwei kotidala Ierusalem.

²⁹ Kadekadeo a lao koti dong Petpake o Petanien impan dol me ad a Oliwe, ap kotin poronela sapwilim a tounpadak riamen,

³⁰ Masani: Koma ko ong nan kanim monen, koma lao pedelong, koma pan diarada esel pul amen salidi, me aramas amen saik mondi poa. Lapwada i, ap karedo!

³¹ A ma meamen pan idok re oma: Da me koma lapwa kida i? Koma ap pan inda: Kaun o men dake.

³² A ira me pakadara wei, ap kola o diarada, duen a kotin masani ong ira.

³³ A ni ara lawada esel pul o, ol oko, me naineki, ap indang ira: Da me koma lawa kida esel pul en?

³⁴ Ira ap indada: Kaun o men dake.

³⁵ Ira ari wado ren Iesus, ap irepadi pon esel pul arail likau kan ap potoan dang Iesus poa.

³⁶ Ni a kotikot kokowei, irail ap irepakidi arail likau kan nani al.

³⁷ A lao kotin korendor kotidila dol Oliwe tounpadak kan karos ap wiaki eu ngil laudeda kapinga Kot, pweki manaman akan karos, me re kilanger,

³⁸ Indada: Kapinga ong Nanmarki, me kotido ni mar en Kaun! Nanlang en popol o lingan wasa ileile!

³⁹ A Parisär kai kisan pokon o indai ong i: Saunpadak, kotin kidaue sapwilim omui tounpadak kan.

⁴⁰ I ari kotin sapeng masani ong irail: I indai ong komail, ma mepukat pan nenenla, takai pan id kadededa.

⁴¹ A lao kotin korendor, ap masani kanim o, ap tontonireki,

⁴² Masani: O i men, koe en dedeki om ran mau wet, me pan kare ong uk popol: Ari, a rir sanger mon mas om.

⁴³ Pwe ran apwal ko pan lel ong uk, me om imwintiti pan kele kin uk pena o it pena sang ni pali karos;

⁴⁴ O irail pan kase uk ala iangaki noum seri kan, o re pan karongk uk ala; sota eu takai pan mimieta pon eu, pweki om sota dedeki ansaun om kasosong.

⁴⁵ I ari kotilong ong nan im en kaudok, ap sikon sang me netinet lole,

⁴⁶ Masani ong ir: Nan a intingidier: Im ai im en kapakap, a komail wiaki deun lolap akan.

⁴⁷ I ari kotin kaukawewe nan im en kaudok ran karos. A samero lapalap, o saunkawewe, o me lapalap akan ren aramas raparapaki, en kamatala i.

⁴⁸ A re sota kak diar, me ren wiada, pwe aramas karos apwali i kaualap o men rong i.