¹ A KOTIN aupwil sili ap masani, me kapwapwa kan kasedi ong ar mairong nan deun mairong.

² A pil kotin masani, me li odi samama men kasedi ong lepta riau.

³ A kotin masani: Melel I indai ong komail, li odi samama men et kasedi ong laude sang irail karos.

⁴ Pwe mepukat karos kasedi ong mairong en Kot sang ni ar pai, a li men et kasedi sang ni a samama, a dipisou karos, me a naineki.

⁵ Akai lao kasokasoiadar duen im en kaudok, me kapwata kida takai kasampwal akan o kapwa en mairong kai, ap kotin masani:

⁶ Ran oko kokodo, karos, me komail ududial, pan karangk pasang, sota eu takai pan mi pon eu.

⁷ Irail kalelapok re a potoan ong: Saunpadak iad mepukat pan pwaida? O da pan kilel en mepukat pan wiaui?

⁸ A kotin masani: Komail kalaka, pwe meamen de kotaue komail! Pwe me toto pan kodo ni ad ai o pan inda: Ngai i o ansau korendor! A komail der idauen ir ala.

⁹ A komail lao rong duen mauin o muei sued, ender masak, pwe mepukat pan wiaui mas, a saikenta imwi.

¹⁰ A kotin masani ong irail: Toun sap eu pan u ong eu sap, o wei eu pan u ong eu wei.

¹¹ O rerer laud en sap akan pan wiaui, o lek, o song en somau pan pwaida, o pil sansal kamasapwek kai, o kilel lapalap akan pan pwarada sang nanlang.

¹² A mon mepukat re pan saik komail edi, o kame komail, o panga komail la nan sinakoke kan o imateng pwen kalualang ren nanmarki o saumas akan pweki ad ai.

¹³ A mepukat pan wiaui ong komail, pwen kadede kin ia.

¹⁴ Komail ari inauki ong pein komail nan mongiong omail, me komail sota pan patauki, me komail pan sapengki.

¹⁵ Pwe ngai me pan kalokaia komail, o kalolekongla, pwe me kailong kin komail, en sota kak kalikama, o so palian.

¹⁶ A sam o in omail, o ri ol akan, o sau omail, o kompokepa kan pan panga komail la, o akai komail me re pan kamela.

¹⁷ O aramas karos pan kailong kin komail pweki ad ai.

¹⁸ A sota pit en mong omail pit pan lokidokila.

¹⁹ Dore kila kanongama maur omail:

²⁰ A komail lao udial, me saunpei kan kapili pena Ierusalem, komail ap asaki, me a ola korendor.

²¹ A me mimi Iudäa, ni ansau o, en tangdala nan nana; o me mi nan warong a, en pitila sang; o me mimi nan sap, ender purelang i.

²² Pwe i ansaun depuk, pwe karos, me intingidier, en pwaida.

²³ Suedi ong me lisean o me kadidi seri ni ran oko! Pwe kalokolok pan lapalapia nan sap et o ongiong ong aramas pukat.

²⁴ O re pan kame kila kodlas, o salilang wei karos, o Ierusalem pan tiak pasang ren men liki kan, lao ansau en men liki kan, pan lel.

²⁵ O kilel akan pan wiaui ni katipin, o saunipong, o usu kan, o aramas nan sappa pan masak o pan pingidar, o madau o iluk kan pan angiang ngil laudeda;

²⁶ O aramas akan pan okila ar masak o auiaui me pan wiaui nan sappa; pwe kel en lang akan pan mokideda.

²⁷ Irail ap pan kilangada Nain aramas a kodido ni dapok ki roson o lingan kaualap.

²⁸ Mepukat lao pikikidi wiaui, komail ap sarada o kasinenda, pwe a leler omail kamaioda.

²⁹ A kotin masani karaseras eu ong irail: Kilang tuka pik o tuka karos!

³⁰ Ni omail kilang me irail wiliada, komail kin asaki, me rak o me korendor.

³¹ Iduen komail, komail lao kilang mepukat lao wiaui, komail asaki, me wein Kot korendor.

³² Melel I indai ong komail, di wet sota pan imwila mon mepukat karos pan pwaida.

³³ Lan o sappa pan sorela, a ai masan akan sota pan poula.

³⁴ Komail ari kalaka pein komail, pwe mongiong omail de toutouki kaped en manga, o kamom sakau, o ngongongki maur et, o ran o ap madang lel dong komail.

³⁵ Pwe likamata insar eu, a pan ko dong karos, me kin kakauson sappa.

³⁶ Komail ari masamasan o poden kapakap, pwe komail en war ong en piti sang mepukat karos, me pan wiaui, o en pat ong Nain aramas.

³⁷ Ni ran o a kotin kaukawewe nan im en kaudok o, a ni pong a kotieila kotikot pon dol o me adaneki Oliwe.

³⁸ O aramas karos sangkonai pokon dong i nan im en kaudok o, pwen rong i.