¹ ARAMAS toto ap pokon pena lao kidalar, irail lao it pena, i ap kotin tapiada masani ong sapwilim a tounpadak kan: Komail kalaka kalep en Parisär akan, me malaun.

² Pwe sota me rir kot, me sota pan sansalada. Pil sota me okiok kot, me so pan kalok sili.

³ Ari, me komail pan indada ni wasa rotorot, i me pan sansal nan marain. O me komail pan monginingin nan pera kan, i me pan kalok sili pon im akan.

⁴ A I indai ong komail, kompok pai kan, komail der masak irail, me kin kamela pali war, ap solar kak wia meakot.

⁵ A I pan kaasa kin komail, me komail en masak: Masak i, me manaman ong kamela aramas ap kak kasela nan pweleko. Melel I indai ong komail, i me komail en masak.

⁶ Siok limen sota kin netila ni denar riau? Ari so, sota amen irail me Kot kin maliela.

⁷ Ari, pil pit en mong omail karos me wadawad penaer. Komail ari der masak, pwe komail me mau sang siok toto.

⁸ A I indai ong komail, meamen ponasa ia mon aramas, i me Nain aramas pan ponasa ren tounlang en Kot akan.

⁹ A meamen kamam kin ia mon aramas, i me pan kamamaki mon tounlang en Kot akan.

¹⁰ O meamen me pan lokaia sued duen Nain aramas, a pan kak lapwada. A me lalaue Ngen saraui, a sota pan lapwada.

¹¹ A ma re pan wa komail la nan ar sinakoke kan mon kapung o ren me manaman akan, komail depa lamelame, da me komail pan sapengki de me komail en inda.

¹² Pwe Ngen saraui pan kapame kin komail ni klok ota, me komail en inda.

¹³ A amen toun pokon potoan ong i: Saunpadak, kom kotin masani ong ri ai ol o, en nek pasang at soso.

¹⁴ A kotin masani ong i: Aramas o, is me kasapwil ia da, en saunkapungla o saunnene re oma?

¹⁵ O kotin masani ong irail: Kalaka norok sued, pwe kaidin kapwa toto, me aramas amen kin memaur kida!

¹⁶ A kotin masani ong irail karaseras eu: Ol kapwapwa amen mia, me sap we kaparapar kaualap.

¹⁷ I ari lamelame indada: Da me i en wiada? Pwe solar wasa en nekinek ia ai kapwa kan.

¹⁸ I ari indada: Nan iet me i pan wiada: I pan palang pasang ai im en nak kan, ap kauada me laude sang kai; i wasa me i pan nekidala me wosadang ia o ai dipisou karos;

¹⁹ A i pan indang ngen i: Ngen i, dipisou toto ong par toto, me nekineki ong uk er. En moleilei, o manga, o nim o perenta!

²⁰ A Kot ap masani ong i: Pweipwei men koe, pwe pongpong wet ngen om pan ilakido. A is me pan aneki kapwa pukat, me koe nanak penaer?

²¹ Nan iduen me kin roporop pena dipisou ong pein i, ap sota kapwapwa ren Kot.

²² A a kotin masani ong sapwilim a tounpadak kan: I me I indai ong komail, eder lamelame maur omail, me komail pan tungole, pil iermen pali war, me komail pan likauki!

²³ Maur me kasampwal sang manga, o war me mau sang likau.

²⁴ Kalelapok ong rape kan! Re sota kin kamorok, re pil sota kin nak pena, pil sota arail pera de im en nak, a Kot kin kotin katungole ir. A komail so kasampwal sang manpir kaualap?

²⁵ A is nan pung omail, ni a ngongki, me pan kak use pasang pein i ki tipong en pa eu?

²⁶ Ari, ma komail sota kak ong wiada me mangai, a da me komail kin ngongki okotme?

²⁷ Kalelapok ong kiop akan, me mi nan sap, duen ar kakairida! Re sota kin dodok, o re sota kin monkol pena. A I indai ong komail, pil Salomo ni a lingan karos sota a likau dueta apot irail.

²⁸ Ari, ma iduen Kot kotin kapwataki dip, me mi nan sap ran wet, a lakap pan lokidokila nan stop, iaduen a sota pan madang kalikauwiada komail, me poson tikitik?

²⁹ A komail, ender ngongki, me komail pan manga o nim, o komail der insensued!

³⁰ Pwe mepukat men liki kan kin ngongongki. Pwe Sam omail, me kotikot nanlang, mangi, me mepukat karos mau ong komail.

³¹ A rapaki sapwilim a wei, a mepukat pan pousalang komail.

³² Der masak pwin tikitik koe, pwe iet kupur en Sam omail: En ki ong komail wei o.

³³ Netikila omail kapwa kan, ap kisakisa wei, wiai ong komail ed ko, me sota pan maringala, o pai nanlang, me so pan ola, wasa me lipirap men so kak ong, o man en mot so kak kawela ia.

³⁴ Pwe wasa omail pai mi ia, iei wasa mongiong omail pil kin mia,

³⁵ Nan luke pamail en katengteng pena o omail ser en isis

³⁶ O komail en dueta aramas akan, me auiaui ar monsap ni a pan kodo sang kamadip en papaud, pwe i lao kodo letelet, re en madang ritingada mo a.

³⁷ Ladu ko meid pai, me monsap o ni a pan pwarado, diar ar masamasan. Melel I indai ong komail, a pan kaiada a likau o kamod irail edi ong manga, ap pan apapwali irail.

³⁸ O ma a pwarado ni auer kariau, de kasilu, ap diar ir masamasan, nan meid pai ladu pukat.

³⁹ A komail en asa, ma kaun pan im o asaer ansaun lolap o pan pwarado, a pan masamasan o so pan mueid ong, im a en kulia sang.

⁴⁰ Komail ari pil ononop, pwe Nain aramas pan pwarado niansau me komail sasa.

⁴¹ Petrus ap potoan ong i: Maing, re kotin masani dong kit karaseras wet, de ong irail karos?

⁴² A Kaun o kotin masani: Ari is saunkoa lelapok o lolekong, me a monsap kasapwilada, en kaunda a ladu kan, pwen nek ong irail kan ar manga ni ansau me kon on?

⁴³ Meid pai ladu o, me a monsap pan diarada wiawia duen met ni a pan pwarado!

⁴⁴ Melel I indai ong komail, a pan kasapwiladang i pon a dipisou karos.

⁴⁵ A ma ladu o pan lamelame nan mongiong i: Ai monsap pwapwand, o a pan tapiada kame ladu o lidu kan, o manga o nim, o kamom sakau,

⁴⁶ Monsap en ladu o ap pan pwara do ni ran o, me a so auiaui i, o ni auer, me a sasa, o a pan lepuk pasang i, o kasapokalang nan pung en me soposon akan.

⁴⁷ A ladu o, me asa kupur en a monsap, a sota kaonopada pein i, pil sota wiada kupur a, nan i me pan kamekam kaualap.

⁴⁸ A me sasa, ap wiadar me mau ong kalokolok, nan i me pan kalokolok tikitik. Pwe me aleer me toto, i me pan kida me toto; o me koaki me toto, pan purokido me toto.

⁴⁹ I kodon saundi kisiniai sappa, a da me I en wiada, ma a saundier?

⁵⁰ A mas I pan paptaise kila paptais eu; I ap patau kila melel, a lao daulier.

⁵¹ Komail lamelame, me I kodon ki ong sappa popol? I indai ong komail: So! A pwen kumuei suedala.

⁵² Pwe sang met kokola limen toun im eu pan liak toror pasang; silimen pan palian riamen, o riamen pan palian silimen.

⁵³ Sam pan palian na putak, a putak o pan palian sam a; in pan palian na seripein, a seripein pan palian in a; a li amen pan palian na ol a paud, o en na ol a paud pan palian li o.

⁵⁴ A kotin masani ong pokon o: Komail lao udial dapok sang kapin lang, komail kin inda: A pan katau; o a pan pwaida

⁵⁵ O ma komail kin kilang ang a usang ni pali air, komail kin inda: A pan karakar; o a pan wiaui.

⁵⁶ Malaun komail! Komail asa kasaui mas en sappa o lang, a da me komail sasaki kasauida ansau wet?

⁵⁷ A da me pein komail sota kasauia kida me pung?