¹ Во едину же от суббот зело рано приидоша на гроб, носящя яже уготоваша ароматы: и другия с ними:

² обретоша же камень отвален от гроба,

³ и вшедшя не обретоша телесе Господа Иисуса.

⁴ И бысть не домышляющымся им о сем, и се, мужа два стаста пред ними в ризах блещащихся.

⁵ Пристрашным же бывшым им и поклоньшым лица на землю, рекоста к ним: что ищете живаго с мертвыми?

⁶ Несть зде, но воста: помяните, якоже глагола вам, еще сый в Галилеи,

⁷ глаголя, яко подобает Сыну Человеческому предану быти в руце человек грешник, и пропяту быти, и в третий день воскреснути.

⁸ И помянуша глаголголы Его,

⁹ и возвращшяся от гроба, возвестиша вся сия единомунадесяте и всем прочым.

¹⁰ Бяше же Магдалина Мариа и Иоанна и Мариа Иаковля, и прочыя с ними, яже глаголаху ко Апостолом сия.

¹¹ И явишася пред ними яко лжа глаголы их, и не вероваху им.

¹² Петр же востав тече ко гробу и приник виде ризы едины лежащя: и отиде, в себе дивяся бывшему.

¹³ И се, два от них беста идуща в тойже день в весь отстоящу стадий шестьдесят от Иерусалима, ейже имя Еммаус:

¹⁴ и та беседоваста к себе о всех сих приключшихся.

¹⁵ И бысть беседующема има и совопрошающемася, и Сам Иисус приближився идяше с нима:

¹⁶ очи же ею держастеся, да Его не познаета.

¹⁷ Рече же к нима: что суть словеса сия, о нихже стязаетася к себе идуща, и еста дряхла?

¹⁸ Отвещав же един, емуже имя Клеопа, рече к Нему: Ты ли един пришлец еси во Иерусалим, и не уведел еси бывших в нем во дни сия?

¹⁹ И рече има: киих? Она же реста Ему: яже о Иисусе Назарянине, Иже бысть муж пророк, силен делом и словом пред Богом и всеми людьми:

²⁰ како предаша Его архиерее и князи наши на осуждение смерти и распяша Его:

²¹ мы же надеяхомся, яко Сей есть хотя избавити Израиля: но и над всеми сими, третий сей день есть днесь, отнелиже сия быша:

²² но и жены некия от нас ужасиша ны, бывшыя рано у гроба:

²³ и не обретшя телесе Его, приидоша, глаголющя, яко и явление Ангел видеша, иже глаголют Его жива:

²⁴ и идоша нецыи от нас ко гробу и обретоша тако, якоже и жены реша: Самаго же не видеша.

²⁵ И Той рече к нима: о несмысленная и косная сердцем, еже веровати о всех, яже глаголаша пророцы:

²⁶ не сия ли подобаше пострадати Христу и внити в славу Свою?

²⁷ И начен от Моисеа и от всех пророк, сказаше има от всех Писаний яже о Нем.

²⁸ И приближишася в весь, в нюже идяста: и Той творяшеся далечайше ити:

²⁹ и нуждаста Его, глаголюща: облязи с нама, яко к вечеру есть, и приклонился есть день. И вниде с нима облещи.

³⁰ И бысть яко возлеже с нима, (и) приим хлеб благослови, и преломив даяше има:

³¹ онема же отверзостеся очи, и познаста Его: и Той невидимь бысть има.

³² И рекоста к себе: не сердце ли наю горя бе в наю, егда глаголаше нама на пути и егда сказоваше нама Писания?

³³ И воставша в той час, возвратистася во Иерусалим и обретоста совокупленых единонадесяте и иже бяху с ними,

³⁴ глаголющих, яко воистинну воста Господь и явися Симону.

³⁵ И та поведаста, яже быша на пути, и яко познася има в преломлении хлеба.

³⁶ Сия же им глаголющым, (и) Сам Иисус ста посреде их и глагола им: мир вам.

³⁷ Убоявшеся же и пристрашни бывше, мняху дух видети:

³⁸ и рече им: что смущени есте? И почто помышления входят в сердца ваша?

³⁹ Видите руце Мои и нозе Мои, яко сам Аз есмь: осяжите Мя и видите: яко дух плоти и кости не имать, якоже Мене видите имуща.

⁴⁰ И сие рек, показа им руце и нозе.

⁴¹ Еще же неверующым им от радости и чудящымся, рече им: имате ли что снедно зде?

⁴² Они же даша Ему рыбы печены часть и от пчел сот.

⁴³ И взем пред ними яде,

⁴⁴ рече же им: сия суть словеса, яже глаголах к вам еще сый с вами, яко подобает скончатися всем написанным в законе Моисеове и пророцех и псалмех о Мне.

⁴⁵ Тогда отверзе им ум разумети Писания

⁴⁶ и рече им, яко тако писано есть, и тако подобаше пострадати Христу и воскреснути от мертвых в третий день,

⁴⁷ и проповедатися во имя Его покаянию и отпущению грехов во всех языцех, наченше от Иерусалима:

⁴⁸ вы же есте свидетелие сим:

⁴⁹ и се, Аз послю обетование Отца Моего на вы: вы же седите во граде Иерусалимсте, дондеже облечетеся силою свыше.

⁵⁰ Извед же их вон до Вифании и воздвиг руце Свои, (и) благослови их.

⁵¹ И бысть егда благословляше их, отступи от них и возношашеся на небо.

⁵² И тии поклонишася Ему, и возвратишася во Иерусалим с радостию великою:

⁵³ и бяху выну в церкви, хваляще и благословяще Бога. Аминь.