¹ I mauki, komail en mueid ong ia kisin pweipwei, iei ta komail pan mueid ong ia.

² Pwe ngai me per kin komail dueta Kot, pwe ngai me kileledier komail ong ol amen, pwe i en kasale komail ong Kristus duen seripein makelekel amen.

³ A i masak serpent widingok, me kotaue Ewa, ma a sota pan pil kawela omail lamelam sang ni opampap en Kristus.

⁴ Pwe ma amen pan pwarado, me kin padaki duen amen Iesus, me se sota padaki, de ma komail pan ale eu ngen, me komail sota aleer, de eu rongamau, me komail sota wuki ong, kaidin komail pan peren kida?

⁵ Pwe i lamelame, me ngai kaidin tikitik sang wanporon lapalap akan.

⁶ A ma i sota koiok ong lokaia a kaidin ni ai dedeki, pwe kit sansal ong komail ni song o wasa karos.

⁷ De ngai me wiadar dip eu ni ai akmalkila pein ngai? Pwe komail en indandala ki ai padaki ong komail rongamau en Kot so pwaipwai.

⁸ I atia sang momotisou tei kan ni ai aleer pwain en dodok, pwe i en kak dodok ong komail.

⁹ O ni ai mimi re omail o lao samamala, kaidin amen, me i uki pa meakot, pwe ni ai solar ai meakot, ri atail akan me kodo sang Masetonien me kisa dong ia; ngai ari sota katoutoui komail ni meakot, o i pil pan due!

¹⁰ A duen melel en Kristus mimi lol i, iduen i sota pan mueid ong amen, en kawela kaping wet nan sap en Akaia kan.

¹¹ Pwekida? Pweki ai so pok ong komail? Kot me kotin mangier.

¹² A me i kin wia, i me i pan wiada, pwen kawela karep en akai me inong iong karep en ar suaiki dene irail dueta kit, sota lipilipil is i.

¹³ Pwe wanporon likam pukat o toun dodok likam akan irail, kin kawukilang wanporon akan en Kristus pein irail.

¹⁴ A kaidin kapuriamui eu, pwe iduen Satan kin kawukila pein i, wuki ong tounlang en marain amen.

¹⁵ I me kaidin kapuriamui eu, ma nä papa kan pil pan wukilang papa en pung kan; a imwilar pan duen ar wiawia kan.

¹⁶ I purong indada, sota amen en akpweipwei kin ia, a ma iei, komail ap maki ong ia ai pweipwei, pwe i en suai kin ia ekis.

¹⁷ A me i inda, kaidin Kaun o me i pwili sang, pwe a tapi sang ni tiak en pweipwei, pwe i suaiki pein ngai;

¹⁸ Pwe me toto kin suaiki ni pali uduk, i pil pan suaiki pein ngai.

¹⁹ Pwe komail kin mauki me lolepon kan, pweki komail me lolekong.

²⁰ Pwe komail kin mueid ong amen, en wia kin komail ladu kan, de ma amen kaloke komail, de ma amen kuli komail edi, de ma amen aklapalap, de ma amen pikir komail.

²¹ Mepukat i indang komail, pwen kanamenok ki komail, dene kit luetalar. A ma meamen aima, ngai pil aima, i kin lokaia nin tiak en pweipwei.

²² Irail men Ipru, pil ngai; irail men Israel, pil ngai; irail kadaudok en Apraam, pil ngai;

²³ Irail me papan Kristus, i kin lokaia dueta me iak amen, ngai me lapa sang; ai dodok laud sang, i kalokolok laud sang; i salidier toto sang, i koren iong mela pan pak toto.

²⁴ Pan me limpak Sus oko ki ong ia wok paeisok, eu katoror sang,

²⁵ A pan me silepak re woki kin ia sokon; pan mepak me i pakasuk; pan me silepak takepa i sop olar; pong o ran, me i pepe sili nan madau.

²⁶ Ai sailok me toto; i diar ai apwal nan pilap akan; i diar ai apwal ren lolap akan; i diar ai apwal ren ai kainok; i diar ai apwal nan sap tan; i diar ai apwal nan madau; i diar ai apwal ren saulang likam akan;

²⁷ Ni dodok apwal, ni songsongemas, ni men mangadar o men nim piladar, ni isesol pan pak toto, ni pou o so kidi pa;

²⁸ O me pil kin lel ong ia ni ran karos, o ai apapwali momodisou akan karos.

²⁹ Is me luet, a ngai sota pan luet? Is me kin kamakar, a ngai so?

³⁰ Ma i en suaiki, i pan suaiki ai luet.

³¹ Kot o Sam en Kaun Iesus, me iasanai kokolata, kin mangi, me i sota kin likam.

³² Nan Damaskus nain nanmarki Aretas kopina amen sinsila kanim en men Damaskus ni a inong iong saik ia di.

³³ I ap apikidi kopou eu sang ni wanim tuk en kel o, ap piti sang ni pa a kan.