¹ Бе же некто боля Лазарь от Вифании, от веси Мариины и Марфы сестры ея.

² Бе же Мариа помазавшая Господа миром и отершая нозе Его власы своими, еяже брат Лазарь боляше.

³ Посласте убо сестре к Нему, глаголюще: Господи, се, егоже любиши, болит.

⁴ Слышав же Иисус рече: сия болезнь несть к смерти, но о славе Божии, да прославится Сын Божий ея ради.

⁵ Любляше же Иисус Марфу и сестру ея и Лазаря.

⁶ Егда же услыша, яко болит, тогда пребысть на немже бе месте два дни.

⁷ Потом же глагола учеником: идем во Иудею паки.

⁸ Глаголаша Ему ученицы: Равви, ныне искаху Тебе камением побити Иудее, и паки ли идеши тамо?

⁹ Отвеща Иисус: не два ли надесяте часа еста во дни? Аще кто ходит во дни, не поткнется, яко свет мира сего видит:

¹⁰ аще же кто ходит в нощи, поткнется, яко несть света в нем.

¹¹ Сия рече и посем глагола им: Лазарь друг наш успе: но иду, да возбужу его.

¹² Реша убо ученицы Его: Господи, аще успе, спасен будет.

¹³ Рече же Иисус о смерти его: они же мнеша, яко о успении сна глаголет.

¹⁴ Тогда рече им Иисус не обинуяся: Лазарь умре:

¹⁵ и радуюся вас ради, да веруете, яко не бех тамо: но идем к нему.

¹⁶ Рече же Фома, глаголемый Близнец, учеником: идем и мы, да умрем с ним.

¹⁷ Пришед же Иисус, обрете его четыри дни уже имуща во гробе.

¹⁸ Бе же Вифаниа близ Иерусалима, яко стадий пятьнадесять,

¹⁹ и мнози от Иудей бяху пришли к Марфе и Марии, да утешат их о брате ею.

²⁰ Марфа убо егда услыша, яко Иисус грядет, срете Его: Мариа же дома седяше.

²¹ Рече же Марфа ко Иисусу: Господи, аще бы еси зде был, не бы брат мой умерл:

²² но и ныне вем, яко елика аще просиши от Бога, даст Тебе Бог.

²³ Глагола ей Иисус: воскреснет брат твой.

²⁴ Глагола Ему Марфа: вем, яко воскреснет в воскрешение, в последний день.

²⁵ Рече (же) ей Иисус: Аз есмь воскрешение и живот: веруяй в Мя, аще и умрет, оживет:

²⁶ и всяк живый и веруяй в Мя не умрет во веки. Емлеши ли веру сему?

²⁷ Глагола Ему: ей, Господи: аз веровах, яко Ты еси Христос Сын Божий, иже в мир грядый.

²⁸ И сия рекши, иде и пригласи Марию сестру свою тай, рекши: Учитель пришел есть и глашает тя.

²⁹ Она (же) яко услыша, воста скоро и иде к Нему.

³⁰ Не уже бо бе пришел Иисус в весь, но бе на месте, идеже срете Его Марфа.

³¹ Иудее (же) убо сущии с нею в дому и утешающе ю, видевше Марию, яко скоро воста и изыде, по ней идоша, глаголюще, яко идет на гроб, да плачет тамо.

³² Мариа же яко прииде, идеже бе Иисус, видевши Его, паде Ему на ногу, глаголющи Ему: Господи, аще бы еси был зде, не бы умерл мой брат.

³³ Иисус убо, яко виде ю плачущуся и пришедшыя с нею Иудеи плачущя, запрети духу и возмутися Сам

³⁴ и рече: где положисте его? Глаголаша Ему: Господи, прииди и виждь.

³⁵ Прослезися Иисус.

³⁶ Глаголаху убо Жидове: виждь, како любляше его.

³⁷ Нецыи же от них реша: не можаше ли Сей, отверзый очи слепому, сотворити, да и сей не умрет?

³⁸ Иисус же паки претя в себе, прииде ко гробу. Бе же пещера, и камень лежаше на ней.

³⁹ Глагола Иисус: возмите камень. Глагола Ему сестра умершаго Марфа: Господи, уже смердит: четверодневен бо есть.

⁴⁰ Глагола ей Иисус: не рех ли ти, яко аще веруеши, узриши славу Божию?

⁴¹ Взяша убо камень, идеже бе умерый лежя. Иисус же возведе очи горе и рече: Отче, хвалу Тебе воздаю, яко услышал еси Мя:

⁴² Аз же ведех, яко всегда Мя послушаеши: но народа ради стоящаго окрест рех, да веру имут, яко Ты Мя послал еси.

⁴³ И сия рек, гласом великим воззва: Лазаре, гряди вон.

⁴⁴ И изыде умерый, обязан рукама и ногама укроем, и лице его убрусом обязано. Глагола им Иисус: разрешите его и оставите ити.

⁴⁵ Мнози убо от Иудей пришедшии к Марии и видевше, яже сотвори Иисус, вероваша в Него:

⁴⁶ нецыи же от них идоша к фарисеом и рекоша им, яже сотвори Иисус.

⁴⁷ Собраша убо архиерее и фарисее сонм и глаголаху: что сотворим? Яко Человек Сей многа знамения творит:

⁴⁸ аще оставим Его тако, вси уверуют в Него: и приидут Римляне и возмут место и язык наш.

⁴⁹ Един же некто от них Каиафа, архиерей сый лету тому, рече им: вы не весте ничесоже,

⁵⁰ ни помышляете, яко уне есть нам, да един человек умрет за люди, а не весь язык погибнет.

⁵¹ Сего же о себе не рече, но архиерей сый лету тому, прорече, яко хотяше Иисус умрети за люди,

⁵² и не токмо за люди, но да и чада Божия расточеная соберет во едино.

⁵³ От того убо дне совещаша, да убиют Его.

⁵⁴ Иисус же ктому не яве хождаше во Иудеех, но иде оттуду во страну близ пустыни, во Ефрем нарицаемый град, и ту хождаше со ученики Своими.

⁵⁵ Бе же близ Пасха Иудейска, и взыдоша мнози во Иерусалим от стран прежде Пасхи, да очистятся.

⁵⁶ Искаху убо Иисуса и глаголаху к себе, в церкви стояще: что мнится вам, яко не имать ли приити в праздник?

⁵⁷ Даша же архиерее и фарисее заповедь, да аще кто ощутит (Его), где будет, повесть, яко да имут Его.