¹ По сих иде Иисус на он пол моря Галилеи Тивериадска:

² и по Нем идяше народ мног, яко видяху знамения Его, яже творяше над недужными.

³ Взыде же на гору Иисус и ту седяше со ученики Своими.

⁴ Бе же близ Пасха, праздник Жидовский.

⁵ Возвед убо Иисус очи и видев, яко мног народ грядет к Нему, глагола к Филиппу: чим купим хлебы, да ядят сии?

⁶ Сие же глаголаше искушая его: Сам бо ведяше, что хощет сотворити.

⁷ Отвеща Ему Филипп: двема стома пенязей хлебы не довлеют им, да кийждо их мало что приимет.

⁸ Глагола Ему един от ученик Его, Андрей, брат Симона Петра:

⁹ есть отрочищь зде един, иже имать пять хлеб ячменных и две рыбе: но сии что суть на толико?

¹⁰ Рече же Иисус: сотворите человеки возлещи. Бе же трава многа на месте. Возлеже убо мужей числом яко пять тысящ.

¹¹ Прият же хлебы Иисус и, хвалу воздав, подаде учеником, ученицы же возлежащым: такожде и от рыбу, елико хотяху.

¹² И яко насытишася, глагола учеником Своим: соберите избытки укрух, да не погибнет ничтоже.

¹³ Собраша же и исполниша дванадесяте кошя укрух от пятих хлеб ячменных, иже избыша ядшым.

¹⁴ Человецы же видевше знамение, еже сотвори Иисус, глаголаху, яко Сей есть воистинну Пророк Грядый в мир.

¹⁵ Иисус убо разумев, яко хотят приити, да восхитят Его и сотворят Его царя, отиде паки в гору един.

¹⁶ Яко позде бысть, снидоша ученицы Его на море,

¹⁷ и влезоша в корабль, и идяху на он пол моря в Капернаум. И тма абие бысть, и не (у) бе пришел к ним Иисус.

¹⁸ Море же, ветру велию дыхающу, воздвизашеся.

¹⁹ Гребше же яко стадий двадесять пять или тридесять, узреша Иисуса ходяща по морю и близ корабля бывша, и убояшася.

²⁰ Он же глагола им: Аз есмь, не бойтеся.

²¹ Хотяху убо прияти Его в корабль: и абие корабль бысть на земли, в нюже идяху.

²² Во утрий (же) народ, иже стояше об он пол моря, видев, яко корабля иного не бе ту, токмо един той, в оньже внидоша ученицы Его, и яко не вниде со ученики Своими Иисус в корабль, но едини ученицы Его идоша:

²³ и ини приидоша корабли от Тивериады близ места, идеже ядоша хлебы, хвалу воздавше Господеви:

²⁴ егда же видеша народи, яко Иисуса не бысть ту, ни ученик Его, влезоша сами в корабли и приидоша в Капернаум, ищуще Иисуса,

²⁵ и обретше Его об он пол моря, реша Ему: Равви, когда зде бысть?

²⁶ Отвеща им Иисус и рече: аминь, аминь глаголю вам, ищете Мене, не яко видесте знамение, но яко яли есте хлебы и насытистеся:

²⁷ делайте не брашно гиблющее, но брашно пребывающее в живот вечный, еже Сын Человеческий вам даст: Сего бо Отец знамена Бог.

²⁸ Реша же к Нему: что сотворим, да делаем дела Божия?

²⁹ Отвеща Иисус и рече им: се есть дело Божие, да веруете в Того, Егоже посла Он.

³⁰ Реша же Ему: кое убо Ты твориши знамение, да видим и веру имем Тебе? Что делаеши?

³¹ Отцы наши ядоша манну в пустыни, якоже есть писано: хлеб с небесе даде им ясти.

³² Рече убо им Иисус: аминь, аминь глаголю вам, не Моисей даде вам хлеб с небесе, но Отец Мой дает вам хлеб истинный с небесе:

³³ хлеб бо Божии есть сходяй с небесе и даяй живот миру.

³⁴ Реша убо к Нему: Господи, всегда даждь нам хлеб сей.

³⁵ Рече же им Иисус: Аз есмь хлеб животный: грядый ко Мне не имать взалкатися, и веруяй в Мя не имать вжаждатися никогдаже.

³⁶ Но рех вам, яко и видесте Мя, и не веруете.

³⁷ Все, еже дает Мне Отец, ко Мне приидет, и грядущаго ко Мне не изжену вон:

³⁸ яко снидох с небесе, не да творю волю Мою, но волю пославшаго Мя Отца.

³⁹ Се же есть воля пославшаго Мя Отца, да все, еже даде Ми, не погублю от Него, но воскрешу е в последний день.

⁴⁰ Се же есть воля Пославшаго Мя, да всяк видяй Сына и веруяй в Него имать живот вечный, и воскрешу его Аз в последний день.

⁴¹ Роптаху убо Иудее о Нем, яко рече: Аз есмь хлеб сшедый с небесе.

⁴² И глаголаху: не Сей ли есть Иисус сын Иосифов, Егоже мы знаем отца и Матерь? Како убо глаголет Сей, яко с небесе снидох?

⁴³ Отвеща убо Иисус и рече им: не ропщите между собою:

⁴⁴ никтоже может приити ко Мне, аще не Отец пославый Мя привлечет его, и Аз воскрешу его в последний день.

⁴⁵ Есть писано во пророцех: и будут вси научени Богом. Всяк слышавый от Отца и навык, приидет ко Мне.

⁴⁶ Не яко Отца видел есть Кто, токмо сый от Бога, Сей виде Отца.

⁴⁷ Аминь, аминь глаголю вам: веруяй в Мя имать живот вечный.

⁴⁸ Аз есмь хлеб животный:

⁴⁹ отцы ваши ядоша манну в пустыни и умроша:

⁵⁰ сей есть хлеб сходяй с небесе, да, аще кто от него яст, не умрет:

⁵¹ Аз есмь хлеб животный, иже сшедый с небесе: аще кто снесть от хлеба сего, жив будет во веки: и хлеб, егоже Аз дам, Плоть Моя есть, юже Аз дам за живот мира.

⁵² Пряхуся же между собою Жидове, глаголюще: како может Сей нам дати Плоть (Свою) ясти?

⁵³ Рече же им Иисус: аминь, аминь глаголю вам: аще не снесте Плоти Сына Человеческаго, ни пиете Крове Его, живота не имате в себе.

⁵⁴ Ядый Мою Плоть и пияй Мою Кровь имать живот вечный, и Аз воскрешу его в последний день.

⁵⁵ Плоть бо Моя истинно есть брашно, и Кровь Моя истинно есть пиво.