¹ По сих (же) бе праздник Иудейский, и взыде Иисус во Иерусалим.

² Есть же во Иерусалимех Овчая купель, яже глаголется еврейски Вифесда, пять притвор имущи:

³ в тех слежаше множество болящих, слепых, хромых, сухих, чающих движения воды:

⁴ Ангел бо Господень на (всяко) лето схождаше в купель и возмущаше воду: (и) иже первее влазяше по возмущении воды, здрав бываше, яцем же недугом одержимь бываше.

⁵ Бе же ту некий человек, тридесять и осмь лет имый в недузе (своем).

⁶ Сего видев Иисус лежаща и разумев, яко многа лета уже имяше (в недузе), глагола ему: хощеши ли цел быти?

⁷ Отвеща Ему недужный: ей, Господи, человека не имам, да, егда возмутится вода, ввержет мя в купель: егда же прихожду аз, ин прежде мене слазит.

⁸ Глагола ему Иисус: востани, возми одр твой и ходи.

⁹ И абие здрав бысть человек: и взем одр свой и хождаше. Бе же суббота в той день.

¹⁰ Глаголаху же Жидове исцелевшему: суббота есть, и не достоит ти взяти одра (твоего).

¹¹ Он (же) отвеща им: Иже мя сотвори цела, Той мне рече: возми одр твой и ходи.

¹² Вопросиша же его: кто есть Человек рекий ти: возми одр твой и ходи?

¹³ Изцелевый же не ведяше, Кто есть: Иисус бо уклонися, народу сущу на месте.

¹⁴ Потом (же) обрете его Иисус в церкви и рече ему: се, здрав еси: ктому не согрешай, да не горше ти что будет.

¹⁵ Иде (же) человек и поведа Иудеом, яко Иисус есть, иже мя сотвори цела.

¹⁶ И сего ради гоняху Иисуса Иудее и искаху Его убити, зане сия творяше в субботу.

¹⁷ Иисус же отвещаваше им: Отец Мой доселе делает, и Аз делаю.

¹⁸ И сего ради паче искаху Его Иудее убити, яко не токмо разоряше субботу, но и Отца Своего глаголаше Бога, равен Ся творя Богу.

¹⁹ Отвеща же Иисус и рече им: аминь, аминь глаголю вам, не может Сын творити о Себе ничесоже, аще не еже видит Отца творяща: яже бо Он творит, сия и Сын такожде творит.

²⁰ Отец бо любит Сына и вся показует Ему, яже Сам творит: и болша сих покажет Ему дела, да вы чудитеся.

²¹ Якоже бо Отец воскрешает мертвыя и живит, тако и Сын, ихже хощет, живит.

²² Отец бо не судит ни комуже, но суд весь даде Сынови,

²³ да вси чтут Сына, якоже чтут Отца. (а) иже не чтит Сына, не чтит Отца пославшаго Его.

²⁴ Аминь, аминь глаголю вам, яко слушаяй словесе Моего и веруяй Пославшему Мя имать живот вечный, и на суд не приидет, но прейдет от смерти в живот.

²⁵ Аминь, аминь глаголю вам, яко грядет час, и ныне есть, егда мертвии услышат глас Сына Божия и услышавше оживут.

²⁶ Якоже бо Отец имать живот в Себе, тако даде и Сынови живот имети в Себе

²⁷ и область даде Ему и суд творити, яко Сын Человечь есть.

²⁸ Не дивитеся сему: яко грядет час, в оньже вси сущии во гробех услышат глас Сына Божия,

²⁹ и изыдут сотворшии благая в воскрешение живота, а сотворшии злая в воскрешение суда.

³⁰ Не могу Аз о Себе творити ничесоже. Якоже слышу, сужду, и суд Мой праведен есть, яко не ищу воли Моея, но воли пославшаго Мя Отца.

³¹ Аще Аз свидетелствую о Мне, свидетельство Мое несть истинно:

³² ин есть свидетелствуяй о Мне, и вем, яко истинно есть свидетелство, еже свидетелствует о Мне:

³³ вы посласте ко Иоанну, и свидетелствова о истине.

³⁴ Аз же не от человека свидетелства приемлю, но сия глаголю, да вы спасени будете.

³⁵ Он бе светилник горя и светя: вы же восхотесте возрадоватися в час светения его.

³⁶ Аз же имам свидетелство более Иоаннова: дела бо, яже даде Мне Отец, да совершу я, та дела, яже Аз творю, свидетелствуют о Мне, яко Отец Мя посла.

³⁷ И пославый Мя Отец Сам свидетелствова о Мне. Ни гласа Его нигдеже слышасте, ни видения Его видесте,

³⁸ и словесе Его не имате пребывающа в вас, зане, Егоже Той посла, Сему вы веры не емлете.

³⁹ Испытайте Писаний, яко вы мните в них имети живот вечный: и та суть свидетелствующая о Мне.

⁴⁰ И не хощете приити ко Мне, да живот имате.

⁴¹ Славы от человек не приемлю,

⁴² но разумех вы, яко любве Божия не имате в себе.

⁴³ Аз приидох во имя Отца Моего, и не приемлете Мене: аще ин приидет во имя свое, того приемлете.

⁴⁴ Како вы можете веровати, славу друг от друга приемлюще, и славы, яже от Единаго Бога, не ищете?

⁴⁵ Не мните, яко Аз на вы реку ко Отцу: есть, иже на вы глаголет, Моисей, наньже вы уповаете.

⁴⁶ Аще бо бысте веровали Моисеови, веровали бысте (убо и) Мне: о Мне бо той писа.

⁴⁷ Аще ли того писанием не веруете, како Моим глаголголом веру имете?