¹ KOMAIL apwali me luet ni poson o der kaping irail ada.

² Amen kin lamelame, en kangkang song karos, a me luet kin kangkang wan tuka.

³ Meamen me kin kangkang, ender mamaleki, me sota kin kang; o me so kin kangkang, ender kadeikada me kin kang, pwe Kot kin apapwali i.

⁴ Pwe is koe, me kin kadeikada en amen a ladu, pwe ma a pan uda de pupedi a pan nain a saumas eta. Melel, a pan pil uda, pwe Kaun o me kotin kak ong kauada i.

⁵ Amen kin pilada a ran kasampwal mon me tei kan, a amen ran karos dupeneta re a; a amen amen en pung ni a lamelame.

⁶ Meamen me moaki ran eu, Kaun o me a moaki ong, me kin manga, Kaun o me a manga ong, pwe a kin dangke Kot, o me sota manga, nan Kaun o me a so manga ong, ap kin danke Kot.

⁷ Pwe sota meamen re ’tail kin memaur iong pein i, o sota me kin mela ong pein i.

⁸ Pwe ma kitail memaur, Kaun o me kitail kin memaur iong, o kitail mela, Kaun o me kitail pan mela ong, ari, kitail memaur de mela, sapwilim en Kaun o kitail.

⁹ Pwe i me Kristus matalar ap iasadar, pwen kaunda me melar o memaur akan.

¹⁰ Ari, menda koe kin kadeikada ri om? De koe, menda koe mamaleki ri om? Pwe kitail karos pan wisikelang mol en kadeik en Kot;

¹¹ Pwe a intingidier: Kaun o kaukila pein i masani: Nä karos pan kelepuki ong ia, o lo karos kadede Kot.

¹² Nan i kitail karos pan weokada pein kitail ong Kot.

¹³ Kitail ari ender kadeikada amen amen; a mak eta, kitail en kadeikada iet akan, ender ki ong ri atail kasasepa de men kamakar.

¹⁴ Ngai me lamedar o asadar pan Kaun Iesus, me sota okotme me udan samin; a meamen, me kasamineki meakot, nan i me samin ong.

¹⁵ Pwe ma ri om pan insensuedeki om kisin manga, koe sota kin weweid nin tiak en limpok; ender kawe kila om manga i, me Kristus mata kilar.

¹⁶ Komail ari kalaka, pwe omail wiawia mau de kalok sued:

¹⁷ Pwe wein Kot kaidin manga o nim, a pung, o popol, o peren ren Ngen saraui.

¹⁸ Pwe me kin papa Kristus ni mepukat, i me pung ren Kot o pil konekon ren aramas akan.

¹⁹ Kitail ari en inong iong meakan, me kin kareda popol o kamakamaui kitail pena amen amen.

²⁰ Koe ender kawe kila kisin manga wiawia en Kot. Ari, karos me min, ap sued ong aramas amen, me luet ap mangamanga.

²¹ Me mau, koe ender kang uduk de nim wain, de wia meakot, me ri om ol pan pupe kidi, de makaraki, de kaluete kila.

²² A ma om poson mia ni mepukat, ari kamaui pein uk mon Kot. Meid pai, me sota kin kadeikada pein i ki meakan, me a kin kasampwaleki.

²³ A meamen, me peikasal ap manga, me pakadeikadar, pwe a sota tapi sang poson. A karos me sota kin tapi sang poson, iei dip.