¹ ARI, iet me i men inda: Kot kalikalar sapwilim a kan? O so! Pwe ngai pil kisan men Israel, o kadaudok en Apraam, o kainok en Peniamin.

² Kot sota kalikalar sapwilim a kan, me a kotin piladar mas o. De komail sota asa, da me kisin likau masanier duen Elias ni a kadipa men Israel mon Kot masani:

³ Maing, irail kamelar sapwilim ar saukop akan, o karongk pasang sapwilim ar pei saraui kan, a ngai ta me lua, a irail pil rapakin ia, pwen kame ia la.

⁴ A da me Kot kotin sapengki i? Ngai me kanikidi ong ia ol isikid me so kelepuki ong Paal.

⁵ Nan iduen ansau wet: Luan me piladar akan mia pweki mak en Kot.

⁶ A ma pweki mak, nan kaidin pweki wiawia kan; pwe ma iduen, mak solar pan mak.

⁷ Ari, iaduen mepukat? Me men Israel raparapaki, re sota diaradar, a me piladar akan diaradar, a me tei kan kapitakailar.

⁸ Duen a intingidier: Kot kotiki ong irail ngen en men mair, o por en mas akan, pwe ren der kilang wasa, o salong akan, pwe ren der rong wasa lao lel ran wet.

⁹ O Dawid masani: Arail tepel en wiala insar parail, o litip arail, o kapup parail, o karia parail.

¹⁰ Mas arail en rotorotala, pwe ren der kilang wasa, o irail en kakos pena kokolata.

¹¹ Ari, iet me i men inda: Irail dipikelekel pwen pupedi? O so! A pweki arail pupedi, en id kamaurela men liki kan, pwen kapopot kin irail do.

¹² Ari, ma arail pupedi id pai ong sappa, a arail momalar id pai ong men liki kan, ia wan pai, ma irail karos pan sapaledo!

¹³ Pwe men liki komail, me i men padaki ong, pwe ngai wanporon en men liki kan, i men kaindinda ai dodok.

¹⁴ Pwe ma i kak ong, i pan kainong irail, me kit eu ni pali uduk pwe akai re ’rail en dorela.

¹⁵ Pwe ma arail kalikilar id kalamalam maula sappa, arail kasapaledo so pan kamaurela sang ren me melar akan?

¹⁶ A ma kalap me saraui, plaua amas pil pan saraui; o ma kalaua me saraui, ra kan pil pan dueta;

¹⁷ A ma ra kai tapengok sang, a koe ni om wos mal id peus iong, ap iang nim pil en tuka o iang maurki kalaua,

¹⁸ Koe ap der suaiki ong ra kan! A ma koe suaiki ong irail, kaidin koe me kin wa kalaua, a kalaua kin wa uk.

¹⁹ Koe ap pan indada: Ra kan tapengok wei sang, pwe i en id peus ong.

²⁰ Me pung; soposon, me re tapengok kilar, a poson, me koe maur kila, koe der aklapalap a masak!

²¹ Pwe ma Kot kotin muei sang udan ra kan, kalaka, pwe ele a pil pan muei sang uk!

²² Ari, kilang kalangan o ongiong en Kot; ongiong ong irail, me salongalar, a kalangan ong uk, ma koe pan dadaurata a kalangan, a ma so, koe pil pan tapengok sang.

²³ A pil irail, ma irail sota pan mimieta ni arail soposon, re ap pan peus sapal, pwe Kot kotin kak ong kapure irail do.

²⁴ Pwe ma koe lepuk sang ni tuka olip mal, ap peus sapal ong tuka olip mau, a iaduen udan ra mau kan, re sota pan kak pur ong udan ar tuka?

²⁵ Ri ai kan, i men, komail en lelapok ki kaponepon wet, pwe komail de aklolekong, duen apali en Israel me kapitakailar, lao lel ansaun irail me pilipildar ren men liki kan pwarador.

²⁶ Men Israel karos ap pan maureda, duen a intingidier: Amen pan kotido sang Sion, me pan kawela karos me doo sang Kot akan ren Iakop.

²⁷ Pwe iet ai inau ong irail, i lao lapwa sang irail dip arail akan.

²⁸ Iran rongamau irail me imwintiti pweki komail, a iran lipilipil irail me kompokepa kan pweki sam akan.

²⁹ Pwe Kot sota kin kalukila a pai en mak akan de me a kotin piladar.

³⁰ O duen komail, me pil sota poson Kot mas o, a met komail aleer mak, pweki arail soposon.

³¹ Iduen irail me sota poson mak, me komail diaradar, iei me re pil sota diaradar mak en Kot.

³² Pwe Kot me kotin kapata pena irail karos ni soposon, pwen mak pena ong karos.

³³ O meid laud erpit en Kot o a kotin mangi meakaros, sota me kak weweki a kadeik kan, de pameda al en a wiawia kan!

³⁴ Pwe is me asaer kupur en Kaun o, de is me padaki ong i meakot?

³⁵ De is me ki ong i meakot, pwen depuk ong i?

³⁶ Pwe meakaros tapi sang re a, o mia pweki i, o wiai ong i, lingan en ko ong i kokolata! Amen.