¹ Se yon chante David pou yo chante lè y'ap moute lavil Jerizalèm. Si Seyè a pa t' kanpe pou nou, ki jan sa ta ye! Se pou pèp Izrayèl la rekonèt sa.

² Wi, si Seyè a pa t' kanpe pou nou, lè moun yo te leve dèyè nou an,

³ yo ta vale nou tou vivan, lè yo te move sou nou an.

⁴ Dlo ta kouvri nou, lavalas ta pase sou nou.

⁵ Wi, lavalas ta pote nou ale.

⁶ Ann fè lwanj Seyè a ki pa kite lènmi nou yo devore nou.

⁷ Nou chape tankou yon ti zwezo ki chape soti nan pèlen chasè. Fil pèlen an kase. Nou chape, n' ale.

⁸ Se Seyè a k'ap pote nou sekou, se li menm ki fè syèl la ak latè a.