¹ Døm ikkje, elles vert de dømde! For den domen de dømer, skal de dømast etter,

² og det målet de mæler med, skal dei mæla åt dykk i.

³ Kvi ser du flisi i auga åt bror din, men bjelken i ditt eige auga, den vert du ikkje var?

⁴ Eller korleis kann du segja til bror din: Kom, lat meg taka flisi ut or auga ditt! og sjå, det sit ein bjelke i ditt eige auga!

⁵ Din hyklar! Drag fyrst bjelken ut or ditt auga - då kann du sjå å taka flisi ut or auga åt bror din.

⁶ Gjev ikkje hundarne det som heilagt er, og kasta ikkje perlorne dykkar for svini! Dei kjem berre til å trøda deim under føterne, og snu seg og riva dykk sund.

⁷ Bed, so skal de få, leita, so skal de finna, banka på, so skal det verta upplate for dykk!

⁸ For kvar den som bed, han fær, og den som leitar, han finn, og den som bankar på, vert det upplate for.

⁹ Eller er det nokon av dykk som gjev son sin ein stein når han bed honom um brød,

¹⁰ eller ein orm når han bed um ein fisk?

¹¹ Når no de veit å gjeva borni dykkar gode gåvor, de som er vonde, kor mykje meir vil so ’kje far dykkar i himmelen gjeva noko godt til deim som bed honom!

¹² Alt som de då vil at andre skal gjera mot dykk, det skal de og gjera mot deim; for so er lovi og profetarne.

¹³ Gakk inn igjenom den tronge porten! For vid er den porten, og breid er den vegen som fører til fortaping, og mange er dei som gjeng inn der.

¹⁴ Men trong er den porten, og smal er den vegen som fører til livet, og få er dei som finn honom.

¹⁵ Tak dykk i vare for dei falske profetarne! Dei kjem til dykk i saueham, men innvertes er dei gråduge ulvar.

¹⁶ På frukterne deira skal de kjenna deim; kann ein hausta druvor av klunger eller fikor av tistlar?

¹⁷ Soleis ber alle gode tre god frukt; men låke tre ber vond frukt,

¹⁸ eit godt tre kann ikkje bera vond frukt, og eit låkt tre kann ikkje bera god frukt.

¹⁹ Men kvart tre som ikkje gjev god frukt, vert hogge ned og kasta på elden.

²⁰ So skal de då kjenna deim på frukterne.

²¹ Ikkje alle som segjer til meg: «Herre, herre!» skal koma inn i himmelriket, men dei som gjer det far min i himmelen vil.

²² På den dagen skal mange segja til meg: «Herre, herre, hev me ikkje tala profetord i ditt namn, og drive ut djevlar i ditt namn, og gjort mange under i ditt namn?»

²³ Då skal eg segja deim beint ut: «Eg hev aldri kjent dykk. Gakk ifrå meg, de illgjerdsmenner!»

²⁴ Den som no høyrer desse ordi mine og gjer etter deim, honom vil eg likna med ein vitug mann, som bygde huset sitt på berg.

²⁵ Og regnet sila, og elvarne fløymde, og vindarne bles og sette mot huset; men det stod; for det var tufta på berg.

²⁶ Og den som høyrer desse ordi mine og ikkje gjer etter deim, han kann liknast med ein fåvis mann, som bygde huset sitt på sand.

²⁷ Og regnet sila, og elvarne fløymde, og vindarne bles og sette mot huset; då fall det, og fallet vart stort.»

²⁸ Då Jesus hadde tala desse ordi, då var folket reint upp i under yver læra hans.

²⁹ For han lærde deim som ein som hev velde, og ikkje som deira skriftlærde.