¹ Sidan førde Anden Jesus ut i øydemarki, so djevelen skulde freista honom.

² Han fasta i fyrti dagar og fyrti næter, og vart hungrig då so langt leid.

³ Og freistaren kom og sagde til honom: «Er du Guds Son, so seg at desse steinarne skal verta til brød!»

⁴ Men han svara: «Det stend skrive: «Menneskja liver ikkje berre av brød, men av kvart ord som kjem frå Guds munn.»»

⁵ Då tok djevelen honom med seg til den heilage byen og sette honom ytst på tempeltaket, og sagde til honom:

⁶ «Er du Guds Son, so kasta deg utfyre! For det stend skrive: «Han englarn’ sine bjoda skal at dei på henderne deg ber, so aldri du på nokon stein skal turva støyta foten din.»»

⁷ Jesus svara: «Det stend og skrive: «Du skal ikkje freista Herren, din Gud.»»

⁸ So tok djevelen honom med seg upp på eit ovhøgt fjell, og synte honom alle verdsens rike og deira herlegdom og sagde:

⁹ «Alt dette gjev eg deg, dersom du fell på kne og tilbed meg.»

¹⁰ Då sagde Jesus til honom: «Gakk frå meg, Satan! For det stend skrive: «Herren, din Gud, skal du tilbeda; honom og ingen annan skal du tena.»»

¹¹ So for djevelen ifrå honom, og med det same kom englarne og tente honom.

¹² Då Jesus fekk høyra at Johannes var gjeven i henderne på uvenerne sine, drog han seg undan og for til Galilæa.

¹³ Sidan flutte han frå Nasaret og busette seg i Kapernaum, som ligg nedmed sjøen, på Sebulons og Naftalis grunn,

¹⁴ so det skulde sannast det som er tala gjenom Jesaja, profeten, når han segjer:

¹⁵ «Sebulons og Naftalis land, som langs med sjøen ligg, og dei som burtum Jordan bur, og heidne bygdekrins -

¹⁶ det folket som i myrker sat, so stort eit ljos fekk sjå; dei sat i daudens skoddeland, då rann for deim eit ljos.»

¹⁷ Frå den tidi tok Jesus til å tala til folket og sagde: «Vend um! Himmelriket er nær!»

¹⁸ Som han no ein gong gjekk frammed Galilæasjøen, fekk han sjå tvo brør, Simon, han som kallast Peter, og Andreas, bror hans; dei heldt på og kasta ei not i sjøen; for dei var fiskarar.

¹⁹ Han segjer til dei: «Kom og fylg meg! Eg vil gjera dykk til menneskje-fiskarar!»

²⁰ Då gjekk dei beint frå garni sine og fylgde honom.

²¹ Då han kom lenger fram, såg han tvo andre brør, Jakob, son åt Sebedæus, og Johannes, bror hans: dei sat i båten hjå Sebedæus, far sin, og greidde garni sine. Han kalla deim,

²² og med ein gong gjekk dei burt frå båten og frå far sin, og fylgde honom.

²³ Sidan for han ikring i heile Galilæa og lærde folket i synagogorne deira, og forkynte evangeliet um riket, og lækte all sjukdom og vanhelsa hjå deim.

²⁴ Det gjekk gjetord um honom yver heile Syria, og dei kom til honom med alle som hadde vondt og drogst med eikor sott eller plåga, forgjorde og nedfall-sjuke og lamne, og han gjorde deim gode att.

²⁵ Og det fylgde honom ein stor folkehop frå Galilæa og Dekapolis og Jerusalem og Judalandet og bygderne på hi sida Jordan.