¹ in illo tempore abiit Iesus sabbato per sata discipuli autem eius esurientes coeperunt vellere spicas et manducare

² Pharisaei autem videntes dixerunt ei ecce discipuli tui faciunt quod non licet eis facere sabbatis

³ at ille dixit eis non legistis quid fecerit David quando esuriit et qui cum eo erant

⁴ quomodo intravit in domum Dei et panes propositionis comedit quos non licebat ei edere neque his qui cum eo erant nisi solis sacerdotibus

⁵ aut non legistis in lege quia sabbatis sacerdotes in templo sabbatum violant et sine crimine sunt

⁶ dico autem vobis quia templo maior est hic

⁷ si autem sciretis quid est misericordiam volo et non sacrificium numquam condemnassetis innocentes

⁸ dominus est enim Filius hominis etiam sabbati

⁹ et cum inde transisset venit in synagogam eorum

¹⁰ et ecce homo manum habens aridam et interrogabant eum dicentes si licet sabbatis curare ut accusarent eum

¹¹ ipse autem dixit illis quis erit ex vobis homo qui habeat ovem unam et si ceciderit haec sabbatis in foveam nonne tenebit et levabit eam

¹² quanto magis melior est homo ove itaque licet sabbatis benefacere

¹³ tunc ait homini extende manum tuam et extendit et restituta est sanitati sicut altera

¹⁴ exeuntes autem Pharisaei consilium faciebant adversus eum quomodo eum perderent

¹⁵ Iesus autem sciens recessit inde et secuti sunt eum multi et curavit eos omnes

¹⁶ et praecepit eis ne manifestum eum facerent

¹⁷ ut adimpleretur quod dictum est per Esaiam prophetam dicentem

¹⁸ ecce puer meus quem elegi dilectus meus in quo bene placuit animae meae ponam spiritum meum super eum et iudicium gentibus nuntiabit

¹⁹ non contendet neque clamabit neque audiet aliquis in plateis vocem eius

²⁰ harundinem quassatam non confringet et linum fumigans non extinguet donec eiciat ad victoriam iudicium

²¹ et in nomine eius gentes sperabunt

²² tunc oblatus est ei daemonium habens caecus et mutus et curavit eum ita ut loqueretur et videret

²³ et stupebant omnes turbae et dicebant numquid hic est Filius David

²⁴ Pharisaei autem audientes dixerunt hic non eicit daemones nisi in Beelzebub principe daemoniorum

²⁵ Iesus autem sciens cogitationes eorum dixit eis omne regnum divisum contra se desolatur et omnis civitas vel domus divisa contra se non stabit

²⁶ et si Satanas Satanan eicit adversus se divisus est quomodo ergo stabit regnum eius

²⁷ et si ego in Beelzebub eicio daemones filii vestri in quo eiciunt ideo ipsi iudices erunt vestri

²⁸ si autem ego in Spiritu Dei eicio daemones igitur pervenit in vos regnum Dei

²⁹ aut quomodo potest quisquam intrare in domum fortis et vasa eius diripere nisi prius alligaverit fortem et tunc domum illius diripiat

³⁰ qui non est mecum contra me est et qui non congregat mecum spargit

³¹ ideo dico vobis omne peccatum et blasphemia remittetur hominibus Spiritus autem blasphemia non remittetur

³² et quicumque dixerit verbum contra Filium hominis remittetur ei qui autem dixerit contra Spiritum Sanctum non remittetur ei neque in hoc saeculo neque in futuro

³³ aut facite arborem bonam et fructum eius bonum aut facite arborem malam et fructum eius malum siquidem ex fructu arbor agnoscitur

³⁴ progenies viperarum quomodo potestis bona loqui cum sitis mali ex abundantia enim cordis os loquitur

³⁵ bonus homo de bono thesauro profert bona et malus homo de malo thesauro profert mala

³⁶ dico autem vobis quoniam omne verbum otiosum quod locuti fuerint homines reddent rationem de eo in die iudicii

³⁷ ex verbis enim tuis iustificaberis et ex verbis tuis condemnaberis

³⁸ tunc responderunt ei quidam de scribis et Pharisaeis dicentes magister volumus a te signum videre

³⁹ qui respondens ait illis generatio mala et adultera signum quaerit et signum non dabitur ei nisi signum Ionae prophetae

⁴⁰ sicut enim fuit Ionas in ventre ceti tribus diebus et tribus noctibus sic erit Filius hominis in corde terrae tribus diebus et tribus noctibus

⁴¹ viri ninevitae surgent in iudicio cum generatione ista et condemnabunt eam quia paenitentiam egerunt in praedicatione Ionae et ecce plus quam Iona hic

⁴² regina austri surget in iudicio cum generatione ista et condemnabit eam quia venit a finibus terrae audire sapientiam Salomonis et ecce plus quam Salomon hic

⁴³ cum autem inmundus spiritus exierit ab homine ambulat per loca arida quaerens requiem et non invenit

⁴⁴ tunc dicit revertar in domum meam unde exivi et veniens invenit vacantem scopis mundatam et ornatam

⁴⁵ tunc vadit et adsumit septem alios spiritus secum nequiores se et intrantes habitant ibi et fiunt novissima hominis illius peiora prioribus sic erit et generationi huic pessimae

⁴⁶ adhuc eo loquente ad turbas ecce mater eius et fratres stabant foris quaerentes loqui ei

⁴⁷ dixit autem ei quidam ecce mater tua et fratres tui foris stant quaerentes te

⁴⁸ at ipse respondens dicenti sibi ait quae est mater mea et qui sunt fratres mei

⁴⁹ et extendens manum in discipulos suos dixit ecce mater mea et fratres mei

⁵⁰ quicumque enim fecerit voluntatem Patris mei qui in caelis est ipse meus et frater et soror et mater est