Namba Tu Pas Bilong Aposel Pol i Go Long Ol Lain

Galesia

¹ ¶ Pol, wanpela aposel, (i no long ol man, o long wok bilong man, tasol long wok bilong Jisas Kraist, na God Papa, husat i kirapim em long dai,)

² Na olgeta brata husat i stap wantaim mi, i go long ol sios bilong Galesia.

³ Marimari i ken stap long yupela na bel isi i kam long God Papa, na i kam long Bikpela bilong yumi Jisas Kraist,

⁴ Husat i givim em yet bilong ol sin bilong yumi, inap long em i ken kisim bek yumi long pasin bilong dispela graun nogut nau, bilong bihainim laik bilong God na Papa bilong yumi.

⁵ Long husat glori i ken stap oltaim oltaim na oltaim. Amen.

⁶ ¶ Mi tingting planti long yupela i lusim em kwiktaim olsem, em husat i singautim yupela long go insait long marimari bilong Kraist i go long narapela gutnius.

⁷ Dispela i no narapela, tasol i gat sampela i stap husat i givim wari long yupela, na husat i gat laik long paulim gutnius bilong Kraist.

⁸ Tasol maski mipela, o wanpela ensel i kam long heven, i autim wanpela gutnius long yupela i arapela long dispela samting mipela i bin autim long yupela, larim em i ken lus olgeta long kot.

⁹ Olsem mipela i tok bipo, olsem tasol nau mi tok gen, Sapos wanpela man i autim wanpela gutnius long yupela i arapela long dispela yupela i bin kisim, larim em i ken lus olgeta long kot.

¹⁰ ¶ Long wanem, ating nau mi pulim tingting bilong ol man, o God? O ating mi painim rot long amamasim bel bilong ol man? Long wanem, sapos yet mi amamasim ol man, mi no ken stap wokboi bilong Kraist.

¹¹ Tasol mi strongim tok long yupela, ol brata, long dispela gutnius mi autim tok long en i no samting i bihainim man.

¹² Long wanem, mi no kisim dispela long man, na tu man i no skulim mi long en, tasol mi kisim long wok bilong soim samting ples klia bilong Jisas Kraist

¹³ Long wanem, yupela i bin harim stori long pasin bilong mi long taim bipo long lotu pasin bilong ol Ju, olsem long mi bin givim hevi long sios bilong God i kalapim skel, na mekim dispela i stap pipia.

¹⁴ Na long lotu pasin bilong ol Ju mi winim antap long planti ol wanmak stret bilong mi long kantri bilong mi yet, taim mi hatwok planti moa yet long bihainim ol kastam bilong ol tumbuna papa bilong mi.

¹⁵ Tasol taim em i amamasim bel bilong God, husat i brukim mi i lusim bel bilong mama bilong mi, na singautim mi long marimari bilong em,

¹⁶ Long soim ples klia Pikinini Man bilong em insait long mi, inap long mi ken autim tok long em namel long ol haiden, wantu mi no kisim tingting wantaim bodi na blut.

¹⁷ Na tu mi no go antap long Jerusalem long ol husat i stap ol aposel bipo long mi. Tasol mi go insait long Arebia, na go bek gen long Damaskas.

¹⁸ Nau bihain long tripela yia mi go antap long Jerusalem long lukim Pita, na mi stap wantaim em 15 de.

¹⁹ Tasol mi no lukim wanpela bilong ol arapela aposel, mi lukim Jems tasol, brata bilong Bikpela.

²⁰ Nau ol dispela samting mi raitim long yupela, lukim, long ai bilong God, mi no giaman.

²¹ Bihain long en mi kam insait long ol hap graun bilong Siria na Silisia.

²² Na ol sios bilong Judia husat i stap insait long Kraist i no save long pes bilong mi.

²³ Tasol ol i bin harim tasol, Long em husat i givim hevi long yumi long ol taim bipo nau i autim tok long dispela bilip tru em i bagarapim olgeta bipo.

²⁴ Na ol i givim glori long God insait long mi.