¹ KOMAIL idauen ia do duen i kin idauen Kristus.

² I kin kapingaki komail omail tamataman ia ni meakan karos, o dadaurata pung kan, duen i kakalikidi ong komail er.

³ A i men, komail en asadar, me Kristus tapwin ol akan, a ol me tapwin li, a Kot me tapwin Kristus.

⁴ A ma amen amen ren ol akan wia kapakap de kokop ap lisoropedi, a kin kasuedeki pein mong a.

⁵ A ma li amen wia kapakap de kokop, ap sota lisoropedi, nan i kin kasuedeki pein mong a, pwe a rasong me pit en mong a seisei sang.

⁶ Pwe ma li amen sota lisoropedi, en koteda, a ma a kanamenok li en kotedar o kotokot, i en pwaindi mong a.

⁷ A ol o ender lisoropedi, pwe i me kasansal o lingan en Kot, a li o me lingan en ol o.

⁸ Pwe ol so tapi sang li, a li sang ol o.

⁹ Pwe ol sota wiaui ong li, a li wiaui ong ol o.

¹⁰ I me li o en kida manaman eu pon mong a pweki tounlang kan,

¹¹ Ari so, li amen sota kak mia ma sota ol; o ol amen sota kak mia, ma sota li, a mepukat ren Kaun o.

¹² Pwe duen li o a tapi sang ol, iduen ol o wiaui kida li, a karos wiauier ren Kot.

¹³ Komail en pein kasauiada, ma a sansal mau, ma li amen kapakap ong Kot, ap so lisoropedi.

¹⁴ De pein komail asa, me kanamenok pan ol, ma a pwilipeipei.

¹⁵ A lingan en li a pwilipeipei, pwe pid en mong a en ko ong i, en pwaindi i.

¹⁶ A ma amen re omail men akamai, a en asa, me kit sota kin wia due, momodisou en Kot akan pil so.

¹⁷ A ni ai kusonededa mepukat i sota kin kapinga omail pokon pena, me sota kin kamaui a kasuedeki komail,

¹⁸ Pwe ni omail pokon pena nan momodisou, i rongadar, me komail kin liak toror pasang, o i mur kamelele.

¹⁹ Pwe komail en liak toror pasang, pwe me pung kan en sansal kida re omail.

²⁰ Komail lao pokon pena wasa kis, kaidin i sak kamadip en Kaun o.

²¹ Pwe ni kamadip toun kapar kin amatang mas, a amen men mangadar, a amen sokolar.

²² Sota im omail, wasa en manga o nim? De komail kin mamaleki momodisou en Kot o kanamenok ir ala, me sota ar tungol? Da me i en inda? I en kaping komail? Ni mepukat i sota pan kapinga.

²³ Pwe i aleer sang ren Kaun o, me i pwiliki ong komail er, me Kaun Iesus pong ota en a pangala, a limada prot,

²⁴ Murin a laolaoki, kamauieda, pilitiki pasang, masangi: Ale tungole war ai met et, me pilitiki ong komail, en wia, pwen katakataman kin ia.

²⁵ A murin sak, a pil kotin limada dal masani: Dal wet iei inau kap, me wiaui kidar nt’ ai. Pan pak en omail nima sang, komail wiaki men kataman kin ia.

²⁶ Pwe pan pak en omail kang prot wet o nima sang dal wet, komail kasansaleda en Kaun a matala, lao a kotido.

²⁷ Ari me kang prot wet o nim sang dal en Kaun o ap so war ong iei me dip iong war o ntan Kaun o.

²⁸ Amen amen en kasauiada pein i, ap kang sang prot o nima sang dal o.

²⁹ Pwe me kang o nim sowar, kin kang o nim kadeik ong pein i, pwe a sota kasampwaleki war o.

³⁰ Nan i me toto nan pung omail me luetalar o somaudar, o me toto mairedier.

³¹ Pwe ma kitail kasauiada pein kitail, kitail sota pan pakadeikada.

³² A ma kitail pan pakadeikada, kitail pan kalokolok ren Kaun o, pwe kitail de iang men liki lokidokila.

³³ Ari ri ai ol akan, komail lao pokon pena pwen sak, en papasan pena amen amen.

³⁴ A ma amen men mangadar, i en manga mas nan im a; pwe komail de pokon penang kadeik o. A me lua kan i pan kapungala ni ai pwara wong.