¹ KOMAIL anane limpok, pil inong iong pai ngenin akan, a iet me kasampwal re ’rail, kokopada!

² Pwe me kin lokaia kida ngil en wai, kaidin aramas akan, me a kin lokaia ong, a ong Kot, pwe sota amen kin dedeki; ari so, ni ngen o a kin lokaia kida me rir akan.

³ A me kin kokop, kin padaki ong aramas akan, pwen kamaui, o panau o kamait ir ala.

⁴ A me lokaiaki ngil en wai, kin kamaui pein i, a me kin kokop, kin kamaui momodisou.

⁵ I men, komail karos en asa lokaia ki ngil toror, a mak eta, komail en kokopada, pwe me kin kokopada, me lapa sang me kin kaparok ki ngil toror, ma a so kak kasiriwukila, pwe momodisou en kamau kila.

⁶ Ari ri ai kan, ma i pwara wong komail, ap lokaia ki ngil toror, da katepa ong komail, ma i sota kaweweda de kasansaleda, de kokopada, de padak?

⁷ Iduen meakan, me kin lokolokaia ap sota memaur, ma men kwai de arp sota pan ngor pasang, is me pan kak dedeki, da me ira kauleki?

⁸ O ma koronete pan popeuk ping, is me pan onopadang mauin?

⁹ A iduen komail, ma komail pan lokaia ki ngil toror, ap sota kaweweda, is me pan dedeki? Pwe omail lokaia pan me mal kot.

¹⁰ Song en lokaia toto nan sappa, a sota eu me so puloi.

¹¹ A ma i sasa wewe en lokaia eu, i pan rasong men wai men ong me kin kaparok, o me kin kaparok, pan rasong men wai men ong ia.

¹² A pil dueta komail, pwe komail kin anane pai ngenin akan, komail ari pil ngongki kakairida ni mepukat, pwen kamauie kila momodisou.

¹³ A ma amen lokaia kida ngil en wai, i en kapakap ap pil kasiriwukila.

¹⁴ Pwe ma i wia kapakap ki lokaia ngil en wai eu, ngen i kin kapakap ap sota katepa ong amen.

¹⁵ Ari, da me i pan wia? I pan kapakap ni ngen i ap pil pan kapakap ni ai lamelam; i pan kapinga ni ngen i ap pil kapinga ni ai lamelam.

¹⁶ A ma koe pan kapaiada ki ngen o, iaduen me sota dedeki pan kak inda amen murin om kapinga? Pwe a sasa me koe indinda.

¹⁷ Ei me mau melel om kapikapinga, a sota kadepa ong me teio.

¹⁸ I kin danke Kot, pweki i kin lokaiaki ngil toror sang komail.

¹⁹ Ari so nan momodisou i men kida lep in lokaia limau, me pwili sang ai lamelam sang lep in lokaia nen ni ngil toror, pwen padaki ong me tei kan.

²⁰ Ri ai kan, komail der wiala seri ni omail lamelam, a ni me sued komail en rasong kisin seri, a ni omail lamelam komail en unsokela.

²¹ A intingidier nan kapung: Lokaia o kil en aua toror, me I pan lokaiaki ong kainok wet, a re pil sota pan duki ong ia, me Kaun o kotin masani.

²² Nan i me lokaia toror mia, pwen kileledi kaidin me poson akan, a me soposon akan; a deideikop kaidin ong me soposon akan, pwe ong me poson akan.

²³ A ma momodisou pan pokon pena wasa kis, o ma karos pan lokaia ni ngil toror, a ma akai iang me sota dedeki, de akai me soposon, irail sota pan inda, me komail iakalar?

²⁴ A ma karos kin kokop, o amen pan pwarado, me soposon, o me sota dedeki, karos pan kasansale ong i dip a, o a pan pakasaui ren karos.

²⁵ Iduen a me rir akan nan mongiong i pan sansaleda, o a pan tairokedi ni mas a, kaudoki ong Kot, o pan inda, melel Kot kotikot re omail.

²⁶ Ri ai kan, iaduen komail ni omail pokon pena, kaidin amen amen kin kida psalm eu? A amen kin kawewe, a amen ngil toror, a amen kasansal eu, a amen kin kasiriwukila; a karos en wiaui, en kamauiada.

²⁷ A ma amen pan wia ngil en wai, me ta riamen, de ma me toto, re pan silimen, a irail pan irok wei a amen en kasirawukila.

²⁸ A ma sota men kasiriwuk mia, i en nenenla nan momodisou; a en kasoi ong pein i o Kot.

²⁹ A riamen de silimen ren saukop akan pan kak kaparok, a me tei kan en kasauiada.

³⁰ A ma amen, ren me momod wasa o, pan diar kasansal eu, men mas ap pan nenenla.

³¹ A komail karos kak kokop, irok weida, pwe karos en padakki o kamaitala.

³² A ngen en saukop akan kin duki ong saukop akan.

³³ Pwe kaidin komoan me ping men Kot, a en popol duen ni momodisou en saraui akan karos.

³⁴ Omail li akan en nenenla nan momodisou kan, pwe a sota muei ong irail, en kaparok; a irail en papa, duen kapung me pil masani.

³⁵ A ma irail men asa okotme, irail en kalelapok ren arail warok kan ni deu ’rail, pwe me kanamenok, li en kaparok nan momodisou.

³⁶ De masan en Kot tapi sang komail? De a ko wong komail eta?

³⁷ A ma amen lamelame, me a saukop amen, de me a ngenin, a en asa wewe en me i intingki wong komail, pwe mepukat kusoned en Kaun o.

³⁸ A ma amen lolepon, i en lolepon.

³⁹ Ari ri ai kan en inong iong kokop, o ender kainapwi lokaia ngil toror.

⁴⁰ A meakaros en wiaui nin tiak mau o pung.